वडगाव निंबाळकर, ता. २९ : कोऱ्हाळे खुर्द (ता. बारामती) परिसरातून पाच ब्रास मातीची अवैध वाहतूक करणारा डंपर पोलिसांनी पाठलाग करून जप्त केला. साखरवाडी (जि. सातारा) येथील कारखाना परिसरात डंपर सोडून चालक पसार झाला असून, ७ लाख २० हजारांच्या मुद्देमालासह चालक-मालकावर गुन्हा दाखल झाला आहे.
याप्रकरणी वडगाव निंबाळकर पोलिस ठाण्याचे अंमलदार संजय भोसले यांनी फिर्याद दिली. २४ ऑक्टोबर रोजी रात्री ११ ते २५ ऑक्टोबर रोजी पहाटे पाचपर्यंत त्यांची रात्रगस्तीची ड्युटी होती. पहाटे तीनच्या सुमारास कोऱ्हाळे खुर्द परिसरात गस्त घालत असताना वडगाव निंबाळकरच्या दिशेने जाणारा दहा चाकी डंपर (एमएच ११ एएल १९५९) त्यांना संशयास्पदरीत्या जाताना दिसला. पोलिसांनी डंपर थांबविण्याचा इशारा केला असता, चालकाने वाहन न थांबवता वेगाने पळ काढला. पोलिसांनी पाठलाग केल्यानंतर चालकाने साखरवाडी येथील साखर कारखान्याच्या बैलगाडा यार्डाच्या गेटमधून डंपर आत नेऊन उभा केला आणि तेथून पलायन केले. पोलिसांनी डंपरची तपासणी केली असता त्यामध्ये पाच ब्रास माती आढळली. याबाबत वडगावचे मंडल अधिकारी गजानन पारवे आणि ग्राम महसूल अधिकाऱ्यांनी मातीचा पंचनामा केला. पोलिसांकडून पुढील तपास सुरू आहे.