पुणे : सायबेरियन हस्की, बिगल, रॉटविलर, लॅब्राडोर, गोल्डन रिट्रीवर, इंडियन अशा विविध प्रजातीचे पाळीव श्वान..खेळण्यासाठी असलेल्या गोष्टी पाहून या श्वानांमध्ये संचारलेला उत्साह..या उत्साहात सहभागी झालेले त्यांचे पालक..अशा ‘प्राणीमय’ वातावरणात ‘सकाळ माध्यम समूहा’तर्फे आयोजित ‘पेटोपिया’ या विशेष उपक्रमाचे शनिवारी (ता. ८) उद्‍घाटन झाले. मुसळधार पावसाने आनंद द्विगुणित झालेल्या या श्वानांनी पावसात भिजत ‘पॉ-सम’ धमाल केली.

पुण्यातील पाळीव प्राणी, त्यांचे पालक आणि सर्व प्राणीप्रेमींसाठी तीन दिवसांचा ‘पेटोपिया गाला’ महोत्सव यावर्षी नोव्हेंबरमध्ये घेतला जाणार आहे. पाळीव प्राण्यांच्या गरजा, हक्क याविषयी समाजात जागृती निर्माण व्हावी, पाळीव प्राण्यांना एकत्र येण्यासाठी हक्काची जागा असावी, या उद्देशातून ‘सकाळ’ने पेटोपिया उपक्रमाचे आयोजन केले आहे. या उपक्रमांतर्गत पाळीव प्राण्यांसाठी दर महिन्याला विविध उपक्रम देखील घेतले जाणार आहेत. याचा शुभारंभ कर्वेनगर येथील ‘टेल ऑफ द सिटी’ येथे झालेल्या विशेष उपक्रमाने झाला. या उपक्रमास ‘बार्क आउट लाऊड, विवाल्डीस हेल्थ अँड फूड’चे सहकार्य लाभले होते.

या वेळी श्वानांनी पालकांसह केक कापत अनोख्या गेट-टू-गेदरचा आनंद घेतला. काही श्वानांची एकमेकांशी गट्टी जमली होती, तर काहींची गट्टी न जमल्याने त्यांच्यात भुंकण्याची अनोखी जुगलबंदी रंगली होती.

आमच्या श्वानाने या उपक्रमात खूप धमाल केली. यापुढेही अशा प्रत्येक उपक्रमात आम्ही सहभागी होणार आहोत आणि पाळीव प्राण्यांचे पालक असलेल्या अन्य मित्र-मैत्रिणींनाही यात सहभागी होण्यास सांगणार आहोत.

- सार्थक शिंदे, सहभागी पालक

मला माझ्या श्वानाला अन्य श्वानांमध्ये मिसळण्यासाठी प्रोत्साहन द्यायचे होते. अशी संधी उपलब्ध करून दिल्याबद्दल ‘सकाळ’चे आभार. या उपक्रमाचे आयोजन अतिशय सुंदर होते. विशेषतः श्वानांसाठी लावलेले संगीत, त्यांच्यासाठी खास असलेला केक, या सर्व गोष्टींनी धमाल आणली.

- रिधिमा देशपांडे, सहभागी पालक

ज्याप्रमाणे माणसांना बागांची, उद्यानांची गरज असते, तशीच प्राण्यांनाही अशा मोकळ्या जागांची खेळण्यासाठी आणि एकत्र येण्यासाठी गरज असते. आपणही समाजाचे भाग आहोत, ही भावना त्यांच्यामध्ये रुजविण्यासाठी अशा प्रकारचे उपक्रम महत्त्वाचे असतात. त्यामुळे ‘सकाळ’ने आयोजित केलेल्या या उपक्रमाचे कौतुक करावे, तितके कमीच आहे.

- अंकिता लांडे, अभिनेत्री