किरकटवाडी: किरकटवाडी-नांदोशी रस्त्यावर किरकटवाडी गावच्या हद्दीत एका व्यक्तीचा डंपर खाली चिरडून जागीच मृत्यू झाला आहे. तिपा गंगाराम गायकवाड (वय 59 रा. किरकटवाडी ) असे मृत्यू झालेल्या व्यक्तीचे नाव आहे. सायंकाळी साडेपाच वाजण्याच्या सुमारास ही दुर्दैवी घटना घडली आहे.(accident news in pune)

मयत तिपा गायकवाड हे अनेक वर्षांपासून किरकटवाडी येथे म्हशीच्या गोठ्यावर मजूर म्हणून काम करत होते. दररोज ते म्हशी चारण्यासाठी नांदोशी- किरकटवाडी या गावांच्या शिवेवर घेऊन जात असत. सायंकाळी साडेपाच वाजण्याच्या सुमारास म्हशी गोठ्याकडे घेऊन येत असताना नांदोशी-किरकटवाडी रस्त्यावर किरकटवाडी गावच्या हद्दीत फरशी कारखाण्यासमोर मागून खडी भरुन आलेल्या डंपरने त्यांना धडक दिली. डंपरच्या पुढच्या चाकाखाली चिरडून गायकवाड यांचा जागीच मृत्यू झाला.

घटनेची माहिती मिळताच हवेली पोलीस ठाण्याचे सहाय्यक पोलीस निरीक्षक निरंजन रणवरे, सहाय्यक पोलीस फौजदार प्रदीप नांदे, अजित शिंदे, पोलीस नाईक गणेश धनवे घटनास्थळी दाखल झाले होते. मृतदेह उत्तरीय तपासणीसाठी ससून रुग्णालयात पाठविण्यात आला असून हवेली पोलीस ठाण्याकडून पुढील कार्यवाही सुरू आहे.