इंदापूर : तालुक्यातील बोराटवाडी येथे सासरच्या छळास कंटाळून सीमा सदाशिव निकम या विवाहित महिलेने विषारी औषध प्राशन करून आत्महत्या केली. याबाबत इंदापूर पोलिस स्टेशन येथे सासू, सासरा व दिर यांचे विरोधात गुन्हा दाखल करण्यात आला आहे.दरम्यान या घटनेमुळे तणावपूर्ण परिस्थिती निर्माण झाली होती अखेर महिलेच्या नातेवाईकांनी सासरच्या दारातच अंत्यविधी केला.

याबाबत मयत महिलेचे वडील शिवाजी भिकु मोरे (वय-57 वर्षे) (रा. डोंबाळवाडी, ता. माळशिरस, जि. सोलापुर) यांनी दिलेल्या फिर्यादीनुसार मागील तीन चार वर्षापुर्वी जावई सदाशिव महादेव निकम याचा इंदापुर परिसरात अपघात झाला होता. त्यामध्ये त्यास 70 टक्के अपंगत्व झाला होता. त्यानंतर तो अंथरूणावरच पडुन होता.

त्यानंतर मुलगी सिमा ही जावयाच्या नावाची अडीच एकर शेती कसत होती. त्यासाठी ती मोटर चालु करण्यासाठी मुलगा रोहीत याचेसोबत शेतात गेली असता तिचा सासरा महादेव रामचंद्र निकम हा तिचे पाठीमागे जायचा व तिचा हात पकडुन तिचे अंगाशी छेडछाड करायचा.त्यास मुलगी सिमाने विरोध केला असता तिचा मानसिक व मानसिक छळ केला.

तसेच मागील तीन वर्षात मुलगी सिमा हिचा सासरा महादेव निकम, तिची सासु संपता महादेव निकम व दीर गोविंद महादेव निकम यांनी ती मुला बाळांसह घर सोडून निघुन जावी याकरीता तिचा शारीरीक व मानसिक छळ चालु केला होता, तसेच तिला सासु सासरे व दिरांनी वेळोवेळी मारहाण देखील केल्याचे मुलगी सिमाने फिर्यादीस सांगीतले होते.

परंतु मुलगी सिमा हिस मोठा मुलगा रोहीत वय 16 वर्षे व लहान मुलगा सुरज वय 13 वर्षे ही दोन मुले असल्याने त्यांच्या भविष्याचा विचार करून तिने सदरचा जाच सहन केला होता. त्यानंतर मागील 15 दिवसापुर्वी सिमा हिस तिचा सासरा महादेव निकम, तिची सासु संपता महादेव निकम व दीर गोविंद महादेव निकम यांनी मारहाण केली होती.

तसेच त्यावेळी सिमाचा मुलगा सुरज हा मध्ये पडला असता महादेव निकम याने कु-हाड घेवुन त्याचे अंगावर धावुन जावुन मारण्याची धमकी दिली. त्यामुळे मुलगी सिमा ही भितीने दोन्ही मुले घेवुन माहेरी राहणेस आली. त्यानंतर दुस-या दिवशी बोराटवाडी गावातील लोकांनी मध्यस्थी करून सदरचा विषय मिटवला. त्यामुळे सिमा हिस नांदण्यासाठी आली.

त्यानंतर 27 ऑक्टोंबर 2023 रोजी सकाळी 9 वाजताचे सुमारास शेतीच्या मोटारीच्या कारणावरून वाद काढुन तिला हाताने व लाथाबुक्क्यांनी मारहाण केली. त्यावेळी सिमा हिने सततच्या जाचाला व मारहाणीला कंटाळुन घरात असलेले तननाषक औषध पिले, त्यानंतर तिचेवर दवाखान्यात उपचार चालु असताना बुधवार (ता. 01) रोजी पहाटे मयत झाल्याचे डॉक्टरांनी घोषीत केले.

यावरून महादेव रामचंद्र निकम, संपता महादेव निकम व गोविंद महादेव निकम (सर्व रा. बोराटवाडी, ता. इंदापुर) यांचे विरोधात गुन्हा दाखल करण्यात आला आहे.

दरम्यान या घटनेमुळे माहेरची लोक प्रचंड संतप्त झाले होते.अखेर सासरच्या दारातच महिलेवर अंत्यसंस्कार करण्यात आले. या घटनेचा पुढील तपास सहाय्यक पोलीस निरीक्षक दिलीप जाधव करीत आहेत.