वालचंदनगर : इंदापूर तालुक्यातील युवक व युवतींनी महाराष्ट्र लोकसेवा आयोगाच्या परीक्षमध्ये घवघवीत यश मिळविले असून यामुळे इंदापूर तालुक्याचा नावलौैकिक राज्यामध्ये वाढला असल्याचे गौरवोद्गार राज्यमंत्री दत्तात्रेय भरणे काढले.

लासुर्णे (ता.इंदापूर) येथे रविवार (ता. २७) रोजी राज्यमंत्री दत्तात्रेय भरणे यांच्या हस्ते इंदापूर तालुक्यातील महाराष्ट्र लोकसेवा आयोगाच्या परीक्षेमध्ये यश मिळविणाऱ्या अकोले येथील अर्चना ज्ञानदेव दराडे ( साहाय्यक मोटार वाहन निरीक्षक), निमसाखर येथील संदेश जयंतराव मोरे (साहाय्यक मोटर वाहन निरीक्षक) व निमगाव केतकी येथील सुप्रिया विठ्ठल राजगुरू (पोलिस उपनिरीक्षक) यांचा सत्कार राज्यमंत्री दत्तात्रेय भरणे यांच्या हस्ते करण्यात आला.

यावेळी आयोजित केलेल्या सत्कार समारंभाच्या कार्यक्रमामध्ये बोलत होते. यावेळी जिल्हा परिषदेचे माजी सदस्य प्रतापराव पाटील,नियोजन मंडळ सदस्य सचिन सपकळ,छत्रपती कारखान्याचे उपाध्यक्ष अमोल पाटील, युवकचे अध्यक्ष शुभम निंबाळकर,जाचकवस्तीचे उपसरपंच प्रकाश नेवसे उपस्थित होते.

यावेळी भरणे यांनी सांगितले की, महाराष्ट्र लोकसेवा आयोगाच्या रखडलेली भरतीची प्रक्रिया महाविकास आघाडी सरकारने सुरु करुन राज्यातील युवक -युवतींना प्रश्‍न सोडविला. एमपीएससीच्या परीक्षेमध्ये इंदापूर तालुक्यातील १० पेक्षा अधिक युवक व युवतींनी यश मिळविले आहे. स्पर्धा परीक्षेमध्ये यश मिळविणाऱ्या इंदापूर तालुक्यातील युवक व युवतींचा अभिमान असून त्यांनी तालुक्याचे नाव राज्यामध्ये झळकवले आहे. स्पर्धा परीक्षेची तयारी करणाऱ्या विद्यार्थ्यांना भगवानराव भरणे प्रतिष्ठानच्या माध्यमातून जास्त मदत करण्यात येणार असून यशस्वी युवक -युवतींनी ही विद्यार्थ्यांना मार्गदर्शन करण्याचे आवाहन केले.