इंदापूर, ता. १८ : पुणे जिल्हा परिषद आरोग्य विभागाच्या ‘आपले गाव, आरोग्य संपन्न गाव’ या मोहिमेअंतर्गत सिद्धेश्वर निंबोडी (ता. बारामती) येथील आरोग्य उपकेंद्रात मंगळवारी (ता. १८) ‘टीबी मुक्त भारत’ अभियान राबविण्यात आले. यात ७२ नागरिकांची एक्स-रे तपासणी करण्यात आली.
बारामती पंचायत समितीचे तालुका आरोग्य अधिकारी डॉ. मनोज खोमणे व वैद्यकीय अधिकारी डॉ. अनिल वाघमारे यांच्या मार्गदर्शनाखाली आणि टीबी सुपरवायझर मोहिते यांच्या सहभागातून हा उपक्रम घेण्यात आला. यावेळी सरपंच संतोष सोनवणे व माजी उपसरपंच नामदेव बाड यांच्या हस्ते उद्‍घाटन झाले. या अभियानासाठी आलेल्या एक्स-रे व्हॅनमध्ये लॅब टेक्निशियन नीरज आडे, सूरज जाधव व रोहित जाधव यांनी सहकार्य केले. यावेळी आरोग्य निरीक्षक विजय मदने, आरोग्य सेविका संगीता चव्हाण, आरोग्य सेवक विकास कापसे, आशासेविका रूपाली धुमाळ आदी उपस्थित होते.