Pune Crime: पुण्यात पुन्हा एकदा धक्कादायक घटना घडली आहे. शहरातून सलग तिसऱ्या दिवशी अत्याचाराची घटना समोर आली आहे. पाच वर्षाच्या अल्पवयीन बालकासोबत तीन अल्पवयीन मुलांनी अनैसर्गिक कृत्य केलं आहे. पॉर्न व्हिडिओ दाखवत अनैसर्गिक कृत्य केल्याची माहिती आहे. साम टीव्हीने यासंदर्भातील वृत्त दिलं आहे.

पुण्यातील कोंढवा परिसरातील ही धक्कादायक घटना आहे. पिढीत पाच वर्षीय मुलगा सोसायटीत खेळत असताना तिघांनी मोबाईल मधील अश्लील व्हिडीओ दाखवत अत्याचार केल्याची माहिती आहे. संतापजनक म्हणजे पिढीत पाच वर्षीय बालकाच्या मोठ्या भावासमोर अनैसर्गिक कृत्य करण्यात आले आहे. कोंढवा पोलिसांनी गुन्हा दाखल केला असून अधिक तपास करत आहेत.

पुण्यातून दररोज अत्याचाराच्या घटना समोर येत आहेत. दोन दिवसांपूर्वी बोपदेव घाटामध्ये एका तरूणीवर सामूहिक बलात्कार झाला आहे. पीडित तरुणी आणि तिचा मित्र बोपदेव घाटावर फिरण्यासाठी गेले होते. यावेळी त्यांच्यासोबत हा भयानक प्रकार घडला आहे. पीडित तरुणी उपचारासाठी ससून रुग्णालयात दाखल झाली होती. त्यानंतर हा प्रकार समोर आला. याप्रकरणी तीन आरोपी अद्याप बेपत्ता आहे. पोलिसांनी त्यांचे स्केच बनवले असून शोध सुरु आहे.

पुण्याला क्राईम सिटी म्हणता यावी इतके गुन्हे मोठ्या प्रमाणात घडत आहेत. आकडेवारीनुसार, पुण्यामध्ये गेल्या सात महिन्यामध्ये २६५ बलात्काराच्या घटना घडल्या आहेत. याचा अर्थ पुण्यात दररोज सरासरी एकापेक्षा जास्त बलात्काराच्या घटना घडत आहेत. ही गंभीर बाब आहे. लोकांकडून देखील याबाबत चिंता व्यक्त केली जात आहे. आरोपींवर वचक बसावा अशा प्रकारची शिक्षा देण्याची तरतूद करण्यात यावी अशी मागणी केली जात आहे.