पुणे - आप व काँग्रेसमध्ये जागा वाटप अंतिम टप्प्यावर आली आहे. त्यावरून गुजरात, हरियाणा, पंजाब, दिल्लीमध्ये इंडिया आघाडीला चांगल्या जागा मिळण्याची शक्यता निर्माण झाली आहे. त्यामुळे भाजपकडून अरविंद केजरीवाल यांना सीबीआय किंवा ईडी मार्फत अटक करण्याचे कारस्थान रचले जात आहे, असा आरोप "आप" च्या पदाधिकाऱ्यांनी शुक्रवारी पत्रकार परिषदेत व्यक्त केला.

पत्रकार परिषदेसाठी राज्याचे प्रवक्ते मुकुंद किर्दत, शहराध्यक्ष सुदर्शन जगदाळे, सतीश यादव, अक्षय शिंदे, किरण कद्रे, निरंजन अडागळे व अमोल काळे उपस्थित होते. किर्दत म्हणाले, 'आप व काँग्रेस यांची आघाडी होणार नाही, अशी समजूत करून घेत भाजपने केजरीवाल यांना यापूर्वी इडी मार्फत नोटीस बजावत त्यांच्यावर दबाव टाकण्याचा प्रयत्न केला. त्यानंतर ही त्यांनी प्रतिसाद दिला नाही.

आता आप व काँग्रेस यांच्यासह इंडिया आघाडीत जागा वाटप झाल्याची चर्चा सुरू आहे. बहुतांश राज्यात जागा वाटपाची अधिकृत घोषणा ही केली जाईल. हे भाजपच्या लक्षात आले. त्यामुळे त्यांनी आता अरविंद केजरीवाल यांना केंद्रिय गुन्हे अन्वेषण विभाग (सीबीआय) किंवा सक्तवसुली संचालनालय (ईडी) यांच्याकडून अटकेची कारवाई करण्याचे प्रयत्न सुरू केले आहेत.

आमच्या राज्य व देश पातळीवरील नेत्यांना, पदाधिकाऱ्यांना इंडिया आघाडीतून बाहेर पडण्यासाठी फोन येऊ लागले आहेत. हा लोकशाही विरोधी आहे. त्याविरुद्ध इंडिया आघाडी एकत्रितपणे लढल्याशिवाय राहणार नाही.'