भारतीय लष्कराच्या ताफ्यात ‘इमर्जन्सी प्रोक्युरमेंट’ (ईपी-६) अंतर्गत दोन नवीन स्वदेशी युद्धप्रणालींचा समावेश करण्यात आला आहे. यामध्ये ‘यूएव्ही-लाँचड् प्रिसिजन गायडेड म्युनिशन्स’ (यूएलपीजीएम) आणि ‘अग्निका व्हीटीओएल-१’ (अग्निका व्हीटीओएल-१) या ‘फर्स्ट-पर्सन व्ह्यू’ (एफपीव्ही) कामीकाझे ड्रोनचा समावेश आहे. हैदराबाद येथे पश्चिम कमांडच्या लष्करी अधिकाऱ्यांच्या उपस्थितीत या प्रणाली लष्कराकडे सुपूर्द करण्यात आल्या.

उंचीवरील दुर्गम क्षेत्र, इलेक्ट्रॉनिक वॉरफेअर आणि अचूक मारा करण्याच्या यशस्वी चाचण्यांनंतर या प्रणालींचे हस्तांतरण करण्यात आले. ‘यूएलपीजीएम’ ही प्रणाली संरक्षण संशोधन आणि विकास संस्था (डीआरडीओ) आणि अदानी डिफेन्स अँड एरोस्पेस यांनी संयुक्तपणे विकसित केली आहे. ही या श्रेणीतील भारताची पहिली स्वदेशी ‘लोइटरिंग म्युनिशन’ प्रणाली आहे. यामध्ये ‘इमेजिंग इन्फ्रारेड’ (आयआयआर) सीकर असून, ती ड्रोनच्या माध्यमातून स्थिर आणि हलत्या लक्ष्यांवर अचूक मारा करू शकते. ही प्रणाली ‘जीपीएस’ नसलेल्या किंवा ‘सिग्नल जॅमिंग’च्या परिस्थितीतही प्रभावीपणे काम करण्यास सक्षम आहे.

दुसरी प्रणाली ‘अग्निका व्हीटीओएल-१’ हे भारताचे पहिले स्वदेशी ‘एफपीव्ही कामीकाझे ड्रोन’ आहे. शहरी युद्धभूमी आणि दुर्गम भागात शत्रूचा खात्मा करण्यासाठी हे ड्रोन विकसित करण्यात आले आहे. ५ किलोमीटरची रेंज आणि ताशी ६० किलोमीटर वेग असलेल्या या ड्रोनमध्ये सुरक्षेसाठी त्रिस्तरीय यंत्रणा बसवण्यात आली आहे. या दोन्ही प्रणालींमुळे भारतीय लष्कराची ताकद वाढणार असून, ‘इलेक्ट्रॉनिक वॉरफेअर’च्या काळात या प्रणाली अत्यंत महत्त्वाच्या ठरणार आहेत.