आंधळगाव, ता. २२ : घरातील इन्व्हर्टरची साफसफाई करताना बॅटरीचा अचानक स्फोट होऊन त्यातील अ‍ॅसिड चेहऱ्यावर व डोळ्यांत उडाल्याने अमोल संभाजी पवार (वय ३७) हे गंभीर जखमी झाले. बुधवारी (ता. २१) दुपारी साडेचारच्या सुमारास चिंचणी (ता. शिरूर) येथे ही घटना घडली. वेळेत उपचार मिळाल्याने त्यांच्या डाव्या डोळ्याला असलेला गंभीर धोका टळला.
अमोल पवार हे चिंचणी येथे कुटुंबासह राहतात. बुधवारी दुपारी ते घरातील इन्व्हर्टरची साफसफाई करत असताना अचानक बॅटरीचा स्फोट झाला. त्यातील अ‍ॅसिड चेहऱ्यावर आणि डोळ्यांत उडाल्याने त्यांच्या चेहऱ्याला मोठी दुखापत झाली, तर डाव्या डोळ्यालाही इजा झाली. कुटुंबीयांनी त्यांना तातडीने शिरूर येथील नेत्रतज्ज्ञ डॉ. स्वप्निल भालेकर यांच्या दवाखान्यात दाखल केले. योग्य उपचारानंतर त्यांची प्रकृती स्थिर असल्याचे कुटुंबीयांनी सांगितले. दरम्यान, गुरुवारी (ता. २२) एक्साइड बॅटरी कंपनीचे तंत्रज्ञ अनिल देडंगे यांनी घटनास्थळी भेट देऊन पाहणी केली. इन्व्हर्टर मशीनमधील तांत्रिक बिघाडाची त्यांनी तपासणी केली. या घटनेची कंपनीने सखोल चौकशी करून अमोल पवार यांना नुकसानभरपाई द्यावी, अन्यथा आम्ही कायदेशीर मार्गाने न्याय मागणार आहोत, अशी मागणी चिंचणीचे माजी उपसरपंच दादासाहेब पवार यांनी केली आहे.

बॅटरी फुटण्यामागे चार ते पाच संभाव्य कारणे असू शकतात. मात्र, स्फोटाचे नेमके कारण अद्याप स्पष्ट झालेले नाही. संबंधित बॅटरी बदलून देण्यात आली आहे. नुकसानभरपाई द्यायची की नाही, हा निर्णय कंपनीच्या अखत्यारीत आहे. तरीही संबंधितांना या प्रकरणात योग्य ते सहकार्य केले जाईल.
- किरण सातकर, सेवा अभियंता, एक्साइड बॅटरी