पुणे - बोपदेव घाटात तरुणीवर सामूहिक लैंगिक अत्याचार प्रकरणाचा तपास गुन्हे शाखेकडे सोपविण्यात आला आहे. याबाबतचा आदेश पोलिस आयुक्त अमितेश कुमार यांनी दिला. या प्रकरणात पोलिसांनी शुक्रवारी (ता. ११) एका आरोपीला अटक केली असून, अन्य दोघांचा शोध घेण्यात येत आहे.

चंद्रकुमार रवीप्रसाद कनोजिया (वय २०, रा. डिंडोरी, मध्य प्रदेश) असे अटक केलेल्या संशयिताचे नाव आहे. आरोपी कनोजिया आणि त्याच्या इतर दोन साथीदारांविरुद्ध जबरी चोरीचे गुन्हे दाखल आहेत. इतर दोघा आरोपींचा पोलिस शोध घेत आहेत. ते मध्य प्रदेशातून चोरीच्या उद्देशाने पुण्यात आले होते.

आरोपींनी गुन्हा करण्यापूर्वी बोपदेव घाटात गुरुवारी (ता. ३) रात्री दहाच्या सुमारास मद्य प्राशन केले. त्यानंतर त्यांनी घाटात बसलेल्या तरुण-तरुणीला बांबूने मारहाण केली. कोयत्याच्या धाक दाखवून तिघांनी तरुणीवर लैंगिक अत्याचार केला. तरुणीवर अत्याचार केल्यानंतर आरोपी बोपदेव घाटातून दुचाकीवरून पसार झाले.

ते सातारा रस्त्यावरील शिंदेवाडी परिसरात गेले. पोलिसांना चकवा देण्यासाठी मुख्य रस्त्याऐवजी अंतर्गत रस्त्यांचा वापर केला. सुमारे २० किलोमीटरचे अंतर कापण्यासाठी ८० किलोमीटरचा प्रवास केला. सासवड परिसरात एका पेट्रोल पंपावरील चित्रीकरणात आरोपींचे चेहरे स्पष्ट आढळून आले होते. तसेच, एका मद्य विक्री दुकानात मद्य सेवन करीत असल्याचे दिसून आले.

आरोपींपैकी एकजण सराईत असल्याने त्याचे रेकॉर्ड तपासण्यात आले. या प्रकरणी कोंढवा पोलिस ठाण्यात गुन्हा दाखल आहे. गुन्हा गंभीर स्वरूपाचा असल्याने गुन्हे शाखेकडे तपास सोपविण्यात आला आहे. पोलिस कोठडीत असलेल्या आरोपीकडून इतर दोघा आरोपींची माहिती घेण्यात येत आहे. परंतु अद्याप काही माहिती मिळालेली नाही, असे पोलिसांकडून सांगण्यात आले.