पिंपरी -  महापालिकेच्या पाणीपुरवठा विभागाकडून अनियमित आणि कमी दाबाने होणाऱ्या पाणीपुरवठ्यामुळे चिंचवड- दळवीनगरमधील सोनवणे चाळ, पांढरकर चाळ, समर्थ कॉलनी परिसरातील नागरिक त्रस्त झाले आहेत. गेल्या काही महिन्यांपासून हा प्रकार सुरू असून, प्रशासनाकडून कोणतीही ठोस उपाययोजना होत नसल्याने नागरिक संताप व्यक्त करीत आहेत. 

गेल्या काही महिन्यांपासून पाणी समस्या आहे. या संदर्भात या परिसराला भेट दिली असता, नागरिकांनी पाणीपुरवठा विभागाबाबत तक्रारींचा पाढाच वाचला. 

येथील रहिवासी बाळू सोनवणे म्हणाले, ‘‘गेल्या वर्ष-दीड वर्षापासून पाण्याचा प्रश्‍न आहे. सकाळी सहा वाजता पाणी येते. साडेसातनंतर पाणी मिळत नाही. पाण्याअभावी दसऱ्यानिमित्त साफसफाईची कामेही करता आली नाहीत.’’ 

प्रीती गुजराथी म्हणाल्या, ‘‘पाणी कमी दाबाने येते. कधी-कधी गढूळ पाण्याचा पुरवठा होतो. महापालिकेच्या वतीने काही वेळेस पाणीपुरवठ्याबाबत कोणतीही सूचना न देता तो बंद करण्यात येतो. त्यामुळे गैरसोय होते.’’ 

सुरेश चव्हाण म्हणाले, ‘‘समर्थ कॉलनीत सुमारे १५ इमारती आहेत. बहुतेक इमारतीत दहापेक्षा जास्त सदनिका आहेत. पाण्याच्या कमतरतेमुळे महिन्यातून प्रत्येकाला पाण्यासाठी किमान दोन-चार वेळा टॅंकर मागवावे लागतात.’’ 

लक्ष्मण ढोरे, कृष्णाबाई तापकीर, बशीर शेख यांनीही पाणीपुरवठ्याबद्दल तक्रारी केल्या. या संदर्भात महापालिकेच्या पाणीपुरवठा विभागाशी संपर्क होऊ शकला नाही.