पुणे - पुणे व पिंपरी-चिंचवडमध्ये सुरू असलेला पाऊस व नद्यांना मोठ्या प्रमाणात पाणी सोडण्यात आल्यामुळे हिंजवडी इंडस्ट्रीज असोसिएशनने (एचआयए) ‘आयटी’ कंपन्यांमधील बहुतांश कर्मचाऱ्यांना घरून काम करण्याच्या (वर्क फ्रॉम होम) सूचना दिल्या होत्या. त्यामुळे सोमवारी सुमारे ६० टक्के आयटी कर्मचाऱ्यांनी घरून काम करण्याचा पर्याय निवडला. आज कामावर गेलेल्या उर्वरित ४० टक्के कर्मचाऱ्यांना कंपन्यांनी दुपारीच घरी सोडले.

पुणे व पिंपरी-चिंचवडमधील पूरस्थितीमुळे कर्मचाऱ्यांना प्रवास करण्यात येणाऱ्या अडचणींचा ‘एचआयए’ने विचार केला. त्यानुसार, संघटनेच्या सदस्य असणाऱ्या बहुतांश कंपन्यांच्या कर्मचाऱ्यांना ‘वर्क फ्रॉम होम’च्या सूचना देण्यात आल्या. त्यामुळे आज बहुतांश कर्मचाऱ्यांनी घरूनच काम करण्यास  पसंती दिली. 

दरम्यान, काही कर्मचारी कंपनीच्या बस, खासगी कार, दुचाकी व अन्य वाहनांनी कामासाठी हिंजवडीमध्ये निघाले होते. परंतु, औंधमध्ये आल्यानंतर पूल बंद झाल्याची माहिती त्यांना मिळाली. त्यामुळे त्यांना वरिष्ठांनी घरी जाऊन काम करण्याच्या सूचना दिल्या. कंपनीमध्ये पोचलेल्या कर्मचाऱ्यांना घरी जाण्यात अडचण येऊ नये, यासाठी काही कंपन्यांनी त्यांना दुपारनंतर घरी जाण्यास सांगितले.

सकाळी नेहमीप्रमाणे हडपसर येथून पिंपरीत आयटी कंपनीत मी कामावर निघाले. दुपारी पुरामुळे शहरातील बरेचसे पूल बंद झाल्याचे कळले. त्यामुळे कंपनीने दुपारी तीन वाजता सुटी दिली. 
- मेघा काकडे, संगणक अभियंता 

कंपनीने घरूनच काम करण्याचे निर्देश दिले होते. मी लोहगावमध्ये राहतो, तर माझी कंपनी हिंजवडीमध्ये आहे. औंधमधील पूल बंद असल्याने मी आज घरूनच काम केले.
- जयंत निखारे, संगणक अभियंता

रस्ते बंद, वाहतूक कोंडी आणि वाढलेला पाऊस, यामुळे निम्म्या रस्त्यावरून मी घरी परतले. त्यामुळे आज मी घरून काम केले. 
- प्रियांका गांधी, टाटा कन्सल्टन्सी सर्व्हिसेस