पुणे : सण-उत्सवांचा काळ येत असल्यामुळे काळजी घ्या, असे एकीकडे सांगणाऱ्या केंद्र सरकार, दुसरीकडे नवीन चार मंत्र्यांना मात्र यात्रा काढा असे सांगते. या यात्रा कुठे कुठे झाल्या, कशा पद्धतीने हे सगळ्यांनाच माहिती आहे. त्यांचा फटका निश्‍चित बसणार असून त्यातून कोरोना बधितांची संख्या वाढणार आहे. त्याला जबाबदार कोण, असा उलट सवाल राज्याचे उपमुख्यमंत्री अजित पवार यांनी केंद्र सरकारला रविवार केला.

कोरोना बाधितांची संख्या वाढत असल्यामुळे केंद्र सरकारने केरळ आणि महाराष्ट्राला सजग राहण्याचा इशारा दिला आहे. त्या संदर्भात रविवारी पुण्यात कार्यक्रमासाठी आलेल्या पवार यांना विचारले असता, त्यांनी केंद्र सरकारच्या दुटप्पी धोरणावर टीका कली.

ते म्हणाले, ‘‘केंद्र सरकारने सूचना केली आहे, हे बरोबर आहे. कारण केरळमध्ये एक महत्त्वाचा सण मोठ्या प्रमाणावर साजरा करण्यात आला. त्याचा फटका बसला. देशपातळीवर आज सर्वांत जास्त बाधितांची संख्या केरळमध्ये आहे. ती दिवसेंदिवस वाढत चालली आहे. या संदर्भात मी अधिकाऱ्यांची चर्चा केली. आपल्याकडे देखील संख्या वाढत आहे. येत्या काही दिवसांत दहीहंडी, गणेशोत्सव, नवरात्र आणि त्यानंतर दिवाळी मोठ्या प्रमाणावर साजरी केली जाते. या काळात गर्दी होते. मास्कचा वापर होत नाही. गर्दी वाढल्याने पहिल्या आणि दुसऱ्या लोटेत बाधितांची संख्या वाढली. तिसऱ्या लाटेत ही हे होऊ शकते, याचे मूर्तिमंत उदाहरण म्हणजे केरळ आहे. त्यामुळे काळजी घेण्यासंदर्भात केंद्र सरकारने आवाहन केले. आपण ही काळजी घेतली पाहिजे, या मताचा मी आहे.’’