पुणे : देशातील कोरोनाचा वाढता संसर्ग लक्षात घेता, जेईई आणि नीट या पपरीक्षा पुढे ढकलण्यात याव्यात, अशी मागणी होत आहे. असे असतानाच याबाबत लवकरच निर्णय घेण्यात येणार असल्याचा सुतोवाच केंद्रीय मनुष्यबळ विकास मंत्री रमेश पोखरियाल निशंक यांनी ट्वीटरद्वारे केला आहे. त्यामुळे परीक्षेची तयारी करत असलेल्या लाखो विद्यार्थ्यांना काहीसा दिलासा मिळाला आहे.

कोरोनाच्या पार्श्वभुमीवर पूर्व नियोजित जेईई आणि नीट परीक्षा पुढे ढकलण्यात आल्या आहेत. नॅशनल टेस्टिंग एजेंसीने मे महिन्यात जाहीर केलेल्या सुधारित वेळापत्रकानुसार जेईई मेन ही परीक्षा १८ ते २३ जुलै दरम्यान तर नीट परीक्षा २६ जुलै रोजी होणार आहे. मात्र या परीक्षांचे सुधारित वेळापत्रक जाहीर झाल्यापासून देशभरातील पालक आणि विद्यार्थी हे या परीक्षा आणखी पुढे ढकलण्यात याव्यात, अशी मागणी करत आहेत. त्यासाठी सोशल मिडियावर मोहीमही चालविण्यात येत आहे. याची दखल घेत आता या परीक्षांबाबत लवकरच निर्णय घेण्यात येईल, असे खुद्द केंद्रीय विकास मंत्र्यांनीच ट्विटरद्वारे जाहीर केले आहे. 

मध्य पुण्यात राहणाऱ्या नागरिकांना मिळणार दिलासा? कॉंग्रेसने केली ही मागणी

"सध्याची परिस्थिती विचारात घेता, जेईई आणि नीट परीक्षा पुढे ढकलण्यात याव्यात, अशी मागणी परीक्षा देणारे विद्यार्थी आणि पालक यांनी निवेदन, सूचना, ई-मेल अशा विविध माध्यमातून वेळोवेळी केली आहे. याचा विचार करुन नॅशनल टेस्टिंग एजन्सीला (एनटीए) तज्ञ समिती नेमण्यास सांगितले होते. एनटीएने नेमलेल्या समितीमार्फत सध्याच्या परिस्थितीचा संपूर्ण विचार करून परीक्षेबाबत काय करता येईल, हे सांगणारा अहवाल शुक्रवारपर्यंत (ता. ३) येईल. त्यावरून या दोन्ही परीक्षाबाबत ठोस निर्णय घेण्यात येईल," असे पोखरियाल यांनी ट्वीटरमधील व्हिडिओमध्ये म्हटले आहे.

त्यामुळे एनटीएने नेमलेल्या समितीचा अहवाल शुक्रवारी मंत्रालयाकडे सादर झाल्यानंतर जेईई मेन आणि नीट परिक्षेबाबत निर्णय जाहीर होणार असून विद्यार्थी आणि पालकांचे लक्ष या निर्णयाकडे लागले आहे.

पुण्याच्या बातम्या वाचण्यासाठी येथे  क्लिक करा