निरगुडसर, ता.२१ : आंबेगाव तालुक्यातील नागापूर येथे जमिनीच्या वादाचे चित्रीकरण व वार्तांकन करण्यासाठी गेलेल्या पत्रकाराला मारहाण करून जीवे मारण्याची धमकी देण्यात आली. बुधवारी (ता. १९) घडलेल्या या प्रकरणी पारगाव पोलिसांनी चौघांविरुद्ध गुरुवारी (ता. २०) गुन्हा दाखल केला आहे.विश्वजित अनंथा गवारी (वय ३५, रा. मंचर) यांनी याप्रकरणी फिर्याद दिली आहे. त्यानुसार दिपाली राजेंद्र बगाटे, मुकुंद सावळेराम पोहकर, शिवाजी किसन बगाटे आणि कुंडलिक मोतीराम बगाटे (सर्व रा. नागापूर) यांच्यावर गुन्हा नोंदवण्यात आला आहे. मिळालेल्या माहितीनुसार, फिर्यादी गवारी हे नागापूर येथील बाळू पोहकर यांच्या जमिनीच्या ताब्याचे चित्रीकरण करण्यासाठी गेले होते. या वेळी आरोपींनी त्यांना मज्जाव करत मारहाण व शिवीगाळ केली. ''येथे पुन्हा वार्तांकन केल्यास जीवे मारू'', अशी धमकीही दिल्याचे फिर्यादीत म्हटले आहे. सहाय्यक पोलिस निरीक्षक सचिन कांडगे यांच्या मार्गदर्शनाखाली पोलिस पुढील तपास करत आहेत.