पुणे : संपूर्ण जगात सध्या कोरोनाच्या विषाणूने थैमान घातले आहे. देशात सध्या कोरोनाच्या वाढत्या प्रादुर्भावामुळे चिंतेचं वातावरण आहे. महाराष्ट्रात वाढत्या रुग्णसंख्येच्या पार्श्वभूमीवर 31 मे पर्यंत लॉकडाऊन लागू करण्यात आला आहे. मात्र, या कोरोना संकटामुळे लागू करण्यात आलेल्या लॉकडाऊनमुळे अनेकांच्या रोजगारावर प्रश्नचिन्ह उभं राहिलं आहे. सामान्य फेरीवाले, रिक्षावाले अशा लोकांचे हाल सुरु आहेत. मात्र, या परिस्थितीतही मार्ग काढून संकटाला टक्कर देण्याचा प्रयत्न लोक करत आहेत. अशाच एका सकारात्मक पुढाकाराचे हे उदाहरण!

जगात लोक अनेक प्रकारचे जुगाड करतात, त्यात पुण्यातल्या 'बघतोय रिक्षावाला' फोरमकडून कोरोना रुग्णांना वाचवण्यासाठी 'जुगाड ऍम्ब्युलन्स' ही नवीन संकल्पना सुरू केली आहे. कोरोनामुळे आज रिक्षा चालकांना अनंत अडचणींचा सामना करावा लागत आहे. रिक्षाचे हप्ते भरायचे तसेच घर चालवायचे कसे? असे दररोज सतावणारे प्रश्न आ वासून उभे आहेत. या सर्व प्रश्नांना सोडवण्यासाठी ही 'जुगाड ऍम्ब्युलन्स' संकल्पना फायदेशीर ठरणार आहे. रिक्षामध्ये ऑक्सिजन सिलिंडर बसवून ज्या रुग्णांना सिलेंडरची गरज आहे. त्या रुग्णांना या ऑक्सिजन सिलिंडरमधून देता येऊन रुग्णाचा प्राण वाचवणे सोपे जाईल. विशेष म्हणजे हे ऑक्सिजन सिलिंडर रिक्षा चालक वर्गणी काढून बसवत आहेत. आम्ही कोणाकडून ही पैसे घेत नाही, मात्र ऑक्सिजन, मास्क या किटचे जे पैसे असतील तर घेतो.

''हा ऑक्सिजन सिलिंडर बसवायला दहा हजार रुपये खर्च इतका खर्च येतो. या संघटनेकडून ही सेवा रुग्णांना मोफत दिली जाते. मात्र, रुग्णांकडून स्वखुशीने रिक्षा चालकाला भाडे दिले जाते किंवा ज्याची परिस्थिती नाही अशा रुग्णांना मोफत सेवा देणार असल्याचेही 'वाट बघतोय रिक्षावाला' फोरमच्या पदाधिकाऱ्यांनी सांगितले आहे.''

- डॉ. केशव क्षीरसागर, संस्थापक, बघतोय रिक्षावाला फोरम

कोरोनाच्या संकटाच्या काळात सामान्यांना जेवढी मदत करणे शक्य होणार तेवढी मदत करणार असल्याचे क्षीरसागर यांनी सांगितले आहे. या कोरोनाच्या काळात ही 'जुगाड ऍम्ब्युलन्स' संकल्पना नक्कीच फायदेशीर ठरणार आहे. ही ऍम्ब्युलन्स सेवा मिळवण्यासाठी 9657289411 या क्रमांकावर संपर्क साधण्याचे आवाहन यावेळी करण्यात आले आहे.