बालेवाडी, ता.२७ : बाणेरमध्ये दुर्गाच्या न्यायासाठी चौधरी छत्तीस कोम समाजाकडून श्रद्धांजली सभा झाली. यावेळी मोठ्या संख्येने समाजबांधव उपस्थित होते .
बाणेर परिसरात दुर्गा चौधरी (वय २०) या तरुणीचा संशयास्पद मृत्यू झाला होता. तिच्या मामाच्या घरी तिने आत्महत्या केली आत्महत्या केली की तिची हत्या झाली याबद्दल संभ्रम होता. याबाबत नागरिकांनी पोलिस ठाण्यावर मोर्चा काढून आरोपीवर कारवाईची मागणी केली होती. या प्रकरणाबाबत पोलिसांत फिर्याद दिल्यानंतर पोलिसांनी आरोपी चुनीलाल चौधरी यास अटक केली होती. या घटनेनंतर चौधरी समाजामध्ये तीव्र संतापाची लाट उसळली असून दुर्गाच्या न्यायासाठी बाणेरमध्ये श्रद्धांजली सभा झाली. यावेळी दुर्गा ला भावपूर्ण श्रद्धांजली अर्पण करण्यात आली.
अशा प्रकारच्या घटना वारंवार घडत असल्याने उपस्थितांनी संताप व्यक्त करत संबंधित प्रकरणाची सखोल चौकशी करून दोषींवर कठोर कारवाईची मागणी केली आहे. याप्रकरणातील दोषींना कोणत्याही प्रकारचे संरक्षण मिळू नये यावरही समाजाने भर दिला. यावेळी व्यापारी संघटनेचे पुणे जिल्हा अध्यक्ष सचिन निरगुने, रामलाल चौधरी, प्रकाश तापकीर, पुनम विधाते, शिवशरण सिंग, सारंग वाबळे, शिवम बालवडकर आदी उपस्थित होते.

दिलेल्या फिर्यादीनुसार आरोपी चुन्नीलाल चौधरी यास अटक केली आहे. त्याची पत्नीही यामधे आरोपी आहे. ती गावी गेल्याचे सांगण्यात येत असून तिचा तपास सुरू आहे. सर्व साक्षी, पुरावे, महत्वाचे जबाबही नोंदवून झाले आहेत.
- चंद्रशेखर सावंत, वरिष्ठ पोलिस निरीक्षक, बाणेर पोलीस ठाणे