जेजुरी : जेजुरी-सासवड मार्गावरील लवथळेश्वर परिसरातील काका हलवाई स्वीट सेंटरचे शटर उचकटून अज्ञात तीन चोरट्यांनी १ लाख ५९ हजार ६०० रुपयांचा मुद्देमाल चोरून नेला. यामध्ये दीड लाख रुपयांची रोकड आणि सहा किलो मिठाईचा समावेश असून, ही घटना शुक्रवारी (ता. ४) पहाटे सव्वातीनच्या सुमारास घडली. याबाबत दुकानमालक अक्षय दत्तात्रय भोईटे (वय ३०, रा. नाझरे कॉलनी, नाझरे, ता. पुरंदर) यांनी जेजुरी पोलिस ठाण्यात फिर्याद दिली आहे. भोईटे यांनी दिलेल्या माहितीनुसार, गुरुवारी (ता. ३) जमा झालेली दीड लाख रुपयांची रोकड कंपनीला देण्यासाठी दुकानाच्या काउंटरमध्ये ठेवली होती. रात्री सव्वाअकराच्या सुमारास दुकान बंद करून ते घरी गेले होते. शुक्रवारी सकाळी दुकानाचे शटर उचकटल्याचे निदर्शनास आले. भोईटे, त्यांचे बंधू आकाश व व्यवस्थापक निखिल कुदळे यांनी पाहणी केली असता, १ लाख ५० हजार रुपयांची रोकड आणि काजू बर्फी, काजू गजक, काजू चोकोबाईट अशी ९ हजार ६०० रुपये किमतीची सहा किलो मिठाई चोरीस गेल्याचे स्पष्ट झाले. सीसीटीव्ही फुटेजमध्ये तोंडाला मास्क लावलेले तीन चोरटे दुचाकीवरून आल्याचे आणि चोरी करून पसार झाल्याचे दिसत आहे. सहाय्यक पोलिस निरीक्षक ज्ञानेश्वर उदार यांनी घटनास्थळी भेट दिली असून, पोलिस चोरट्यांचा शोध घेत आहेत.