पुणे : कसबा पेठ विधानसभा पोटनिवडणुकीतील प्रचार सध्या शिगेला पोचला आहे. या भागात पोलिसांकडून वाहनांची तपासणी आणि चोख बंदोबस्त असतानाही चोरट्यांनी सहा ठिकाणी घरफोडीचा प्रयत्न केला. त्यापैकी दोन सदनिकांमधून सोन्याचे दागिने आणि रोकड असा सुमारे सात लाख रुपयांचा ऐवज चोरी केल्याचे समोर आले आहे.

हा प्रकार २० फेब्रुवारी ते २२ फेब्रुवारीच्या दरम्यान घडला. या संदर्भात सतीश मनोहर कामतकर (वय ५२, रा. शाळिग्राम प्रसाद अपार्टमेंट, बुधवार पेठ) यांनी फिर्याद दिली आहे. त्यावरून फरासखाना पोलिस ठाण्यात गुन्हा दाखल करण्यात आला आहे.

पोलिसांनी दिलेल्या माहितीनुसार, शाळिग्राम प्रसाद अपार्टमेंटमधील दुसऱ्या मजल्यावरील कामतकर यांची सदनिका असून, ती बंद होती. चोरट्यांनी या सदनिकेचे कुलूप तोडून साडेसात तोळे सोन्याचे दागिने, चांदी आणि ३० हजार रुपयांची रोकड लांबवली.

तसेच, याच परिसरातील अन्य एका सदनिकेतून सोन्या-चांदीचे दागिने आणि रोकड असा तीन लाख ७० हजार रुपयांचा ऐवज चोरी केला. यासोबतच चोरट्यांनी इतर चार सदनिकांमध्येही घरफोडी करण्याचा प्रयत्न केला.

सध्या कसबा पेठ विधानसभा पोटनिवडणुकीमुळे प्रचाराची धामधूम सुरू आहे. पोलिसांचा बंदोबस्तही वाढविण्यात आला आहे. अशा परिस्थितीत घरफोड्या झाल्यामुळे आश्चर्य व्यक्त करण्यात येत आहे.