पुणे, ता. ३ : कोकण मराठा समाजाची एकजूट आणि सामाजिक बांधिलकी अधोरेखित करणाऱ्या कोकण मराठा नवनिर्माण सेवाभावी संस्थेचा वार्षिक स्नेहमेळावा उत्साहात पार पडला.
सदाशिव पेठेतील भावे प्राथमिक शाळेत झालेल्या या कार्यक्रमात सामाजिक क्षेत्रात उल्लेखनीय काम करणाऱ्या व्यक्तींचा ‘समाजभूषण पुरस्कार’ देऊन गौरव करण्यात आला, तसेच डॉक्टर, चार्टर्ड अकाऊंटंट, वकील आणि दहावी व बारावीतील गुणवंत विद्यार्थ्यांचाही सत्कार झाला. या वेळी डॉ. चेतनानंद महाराज पुणेकर हे प्रमुख पाहूणे म्हणून उपस्थित होते. त्यांनी कोकणची समृद्ध परंपरा आणि तेथील माणसांमधील जिव्हाळ्याच्या नात्यांचे महत्त्व सांगितले. ‘‘कोकणातील माणूस हा निसर्गासारखाच साधा, भोळा आणि प्रेमळ असतो,’’ असे गौरवोद्‍गार त्यांनी काढले, तसेच संस्थेच्या सामाजिक व शैक्षणिक कार्याचेही त्यांनी कौतुक केले.
याप्रसंगी रामचंद्र मोरे, राजेंद्र सोंडकर, शंकर मोरे, बाबाजी मोरे, अरविंद चव्हाण, रमेश मोरे, सुधाकर पाष्टे, प्रकाश मोरे, अजिता महापदी-जाधव आणि रोहन मोरे यांना समाजभूषण पुरस्काराने सन्मानित करण्यात आले. महिलांना हळदी-कुंकू देऊन सन्मानित करण्यात आले. कार्यक्रमासाठी अध्यक्ष दत्ता जाधव, यश शिंदे, संदीप चव्हाण यांच्यासह पदाधिकारी व कार्यकर्त्यांनी परिश्रम घेतले. सुदर्शन जाधव यांनी सूत्रसंचालन केले.