कोथरुड : चांदणी चौक येथे विमनस्क अवस्थेत असलेल्या वृध्द आजींना पाहून बापू भागवत जाधव (केळेवाडी) व संतोष संदीपन साबळे (शास्त्री नगर कोथरुड) या रीक्षा चालकांनी त्यांची आस्थेने चौकशी केली. त्यांना त्यांचे नाव, गाव वा कोठे जायचे हे सांगता आले नाही. त्यामुळे त्या रिक्षा चालकांनी त्यांना कोथरुड पोलिस ठाण्यात मंगळवारी आणले. स्वतःबद्दल काहीही सांगू न शकणा-या या आजींना त्यांचा कुटूंबीयांपर्यंत कसे पोहचवायचे हे पोलिसांपुढे आव्हानच होते.

पोलिस उपनिरिक्षक कुलकर्णी, अंमलदार दीपक धाबेकर व रमेश चौधरी यांनी त्यांच्याबाबत कोठे हरलवल्याची तक्रार आहे का याची चौकशी केली परंतु तसे आढळून आले. नाही. महिला आंमलदार वैशाली परदेशी व स्नेहल गायकवाड यांनी आजींकडे जीव्हाळ्याने विचारपुस केली. परंतु वयोमान व विस्मरणामुळे त्यांना फारसे काही सांगता आले नाही. मात्र सकाळी त्यांनी त्यांचे गाव मोहज देव्हडे असल्याचे सांगितले. त्याचा संदर्भ घेत अंमलदार दादा भवर यांनी याच गावात असलेल्या त्यांच्या मित्राकडे चौकशी केली असता कळाले की मुंबई येथील जुईनगर मध्ये मुलीकडे आजी रहात होत्या. तेथून या आजी दोन दिवसापूर्वी हरवल्या होत्या. त्याबाबत वाशी पोलिस ठाण्यात हरवल्याची तक्रार देखील दाखल करण्यात आली होती.

या आजींचा मुलगा सत्यवान ज्ञानदेव उबाळे हे देहूरोड येथे राहतात. ते आईला शोधण्यासाठी नवी मुंबईला गेले होते. आई सापडत नसल्याने ते सुध्दा बेचैन होते. तेव्ढ्यात आई मिळाल्याची माहिती मिळाल्याने त्यांना हायसे वाटले. त्यांनी कोथरुड पोलिस ठाण्यात येवून आईची गळाभेट घेतली. आईचे नाव साखराबाई ज्ञानदेव उबाळे असून त्यांचे वय 84 आहे.

वरीष्ठ पोलिस निरिक्षक महेंद्र जगताप म्हणाले की, रीक्षा चालकांनी आजींची माणुसकीने विचारपूस केली व त्यांना पोलिस ठाण्यात आणल्याने हे शक्य झाले. कोथरुडमधील नागरिक जागृक व माणुसकीने वागत आहेत त्यामुळे आजींना त्यांच्या घरी पोहचवण्यात यश मिळाले. रीक्षावाल्याने नम्रपणे त्याचे नाव सांगण्यास नकार दिला हे विशेष.