कुरकुंभ, ता. २८ : कुरकुंभ (ता. दौंड) येथील ग्रामदैवत श्री फिरंगाई माता (वरचे मंदिर) येथे रविवार (ता. १) मार्च पारंपरिक गोंधळ आणि महाप्रसाद सोहळ्याचे आयोजन करण्यात आले असून या उत्सवानिमित्त मंदिरात विविध धार्मिक कार्यक्रमांची रेलचेल असणार आहे.
या सोहळ्याची सुरुवात रविवारी सकाळी देवीच्या पंचामृत महापूजेने व अभिषेकाने होणार आहे. त्यानंतर दुपारी देवीचा कुलधर्म-कुलाचार म्हणून ‘गोंधळाचा’ मुख्य कार्यक्रम रंगणार आहे. या सोहळ्याला फिरंगाई देवीचे उपासक अशोकराव खरात (वडगाव धायरी, पुणे) यांच्या हस्ते देवीची विधीवत महाआरती होणार आहे. भक्ती आणि शक्तीचा संगम असलेल्या या कार्यक्रमाची सांगता महाप्रसादाने होईल.
या उत्सवासाठी कुरकुंभ ग्रामस्थ, देवीचे गुरव आणि भाविक मोठ्या संख्येने उपस्थित राहणार आहेत. परंपरेनुसार होणाऱ्या या गोंधळ सोहळ्यासाठी संपूर्ण गाव सज्ज झाले असून, मंदिरावर आकर्षक विद्युत रोषणाई करण्यात आली आहे. या भक्तिमय वातावरणात परिसरातील सर्व भाविक-भक्तांनी उपस्थित राहून देवीच्या आशीर्वादाचा आणि महाप्रसादाचा लाभ घ्यावा, असे आवाहन उत्सव समितीने केले आहे.