पुणे - कोरोनाबाधीत अत्यवस्थ रुग्णांवर प्रभावी ठरत असलेले रेमडेसिव्हिर इंजेक्शन पुण्यात ‘औषधालाही’ मिळत नाही. खासगी रुग्णालयांमध्येही त्यांच्या गरजेच्या तुलनेत जेमतेम पाच टक्के इंजेक्शन वायल उपलब्ध असल्याची माहिती पुढे येत आहे. 

रेमडेसिव्हिर इंजेक्शन कोरोनोबाधीत रुग्णांवर वापरण्यास ‘ड्रग्ज कंट्रोलर जनरल ऑफ इंडिया’ने (डीसीजीआय) मान्यता दिली आहे. गेल्या आठ ते दहा दिवसांपासून त्याचा वापर सुरू असल्याने भारतीय रुग्णांमध्ये हे औषध किती प्रभावी ठरत आहे, याचे निष्कर्ष पुढील दोन महिन्यांमध्ये येतील. पण, या दरम्यान हे औषध पुण्यातील रुग्णांना मिळत नाही. या इंजेक्शन खरेदी करण्यासाठी खासगी रुग्णालयांनी आघाडी घेतली असली तरी त्यांनाही त्यांच्या गरजेपेक्षा खूपच कमी ‘वायल’ मिळत असल्याचे शहरातील रुग्णालयांनी सांगितले. शहरातील एका रुग्णालयात या इंजेक्शनच्या १०० वायलची गरज असल्यास त्यांना फक्त ५ मिळत आहेत, असेही त्यांनी स्पष्ट केले. 

ताज्या बातम्यांसाठी डाऊनलोड करा ई-सकाळचे ऍप   

इंजेक्शनची पुण्यातील स्थिती 
सिप्ला आणि हेटेरो या दोन औषध निर्माण कंपन्यांमधून उत्पादन होणारे रेमडेसिव्हिर हे इंजेक्शन पुण्यातील बाजारपेठेत येते. सध्या बाजारपेठेत या इंजेक्शनचा साठा उपलब्ध नाही. पण, यापूर्वी आलेले इंजेक्शन रुग्णालयांमध्ये पोहोचले आहे. येत्या तीन ते चार दिवसांमध्ये इंजेक्शनचा पुरवठा पुण्यात होईल. या इंजेक्शनच्या तपासणीला १४ दिवस लागतात. येत्या ५ आणि ६ जुलै ही तपासणी पूर्ण होत आहे. त्यानंतर ते पुण्यातील रुग्णांसाठी उपलब्ध होईल, अशी माहिती अन्न व औषध प्रशासनाचे सहआयुक्त एस. बी. पाटील यांनी दिली. 

साठा नसल्याने खरेदीस मर्यादा 
पुणे महापालिका हद्दीतील वेगवेगळ्या रुग्णालयांमध्ये साडेतीनशे अत्यवस्थ रुग्णांवर उपचार सुरू आहेत. पण, त्यांच्यावर उपचारांसाठी रेमडेसिव्हिर या इंजेक्शनची खरेदी अद्यापही झालेली नाही. त्यामागे या इंजेक्शनचा तुटवडा, हे प्रमुख कारण असल्याचे सांगितले जाते. 

राज्याकडून खरेदी नाही 
कोरोनाबाधीत रुग्णांच्या उपचाराच्या मार्गदर्शिकेत रेमडेसिव्हिर इंजेक्शनचा समावेश केला आहे. अत्यवस्थ रुग्णांसाठीच सध्या हे इंजेक्शन वापरण्याचा सल्ला दिला आहे. सरकारी रुग्णालयांकडून किंवा आरोग्य खात्याकडून या इंजेक्शनच्या खरेदीचा कोणताही प्रस्ताव राज्यातील औषध खरेदी करणाऱ्या ‘हाफकिन’ला मिळाला नाही. तसेच, त्याची स्थानिक प्रशासनातर्फेही खरेदी झाल्याची नेमकी माहिती आरोग्य खात्याकडे नाही. 

इंजेक्शन का ठरतंय प्रभावी? 
हे औषध इंजेक्शनमधून थेट शिरेवाटे शरीरात सोडले जाते. त्यामुळे इतर गोळ्यांच्या प्रकारातील औषधांपेक्षा हे जास्त प्रभावी ठरेल, असा विश्वास डॉक्टरांनी व्यक्त केला. 

पुण्याच्या बातम्या वाचण्यासाठी येथे ► क्लिक करा

“रेमडेसिव्हिर इंजेक्शनच्या खरेदी-विक्रीवर बारकाईने ठेवण्याच्या सूचना देण्यात आल्या आहेत. हे औषध फक्त रुग्णालयांनाच विक्री होईल. इतरत्र त्याचा पुरवठा होणार नाही, याची काळजी घेण्याच्या सूचना दिल्या आहेत ” 
- एस. बी. पाटील, सहआयुक्त, एफडीए, पुणे विभाग. 

“रेमडेसिव्हिर हे अँटीव्हायरल इंजेक्शन अतिदक्षता विभागातील तज्ज्ञ अथवा संसर्गजन्य रोग तज्ज्ञ डॉक्टरांच्या सल्ल्यानुसार रुग्णाला दिले पाहिजे. योग्य रुग्णाला हे इंजेक्शन वेळेत दिल्यास त्याचा जास्त चांगला परिणाम उपचारात मिळू शकतो. तसेच, त्याचा तुटवडाही टाळता येईल.” 
- डॉ. कपिल झिरपे, अतिदक्षता विभाग तज्ज्ञ, रुबी हॉल क्लिनिक 

पिंपरी चिंचवडच्या बातम्या वाचण्यासाठी येथे ► क्लिक करा