वडापुरी - इंदापूर तालुक्यातील लाखेवाडी येथील जय भवानी माता देवीचा यात्रा महोत्सव मोठ्या उत्साहात साजरा करण्यात आला. या यात्रे निमित्त मंदिर परिसरात आकर्षक असे विद्युत रोषणाई करण्यात आली होती. यात्रा काळात मंदिरात विविध धार्मिक व सामाजिक कार्यक्रमाचे आयोजन करण्यात आले होते. 

मंदिरापासून देवीच्या पालखीची ढोल ताशांच्या गजरात व फटाक्यांच्या आतषबाजीत मिरवणूक काढण्यात आली होती. या देवीच्या महोत्सावात पहिल्या दिवशी पहाटे देवीचा अभिषेक व महापुजा महाराष्ट्र राज्याचे सार्वजनिक बांधकाम विभागाचे सचिव दिलीपराव ढोले व त्यांच्या पत्नी सहाय्यक विक्रीकर आयुक्त सुजाता ढोले या उभयांताच्या हस्ते करण्यात आली. यावेळी उदयसिंह पाटील, श्रीमंत ढोले व ग्रामस्थ उपस्थित होते.

यात्रेनिमित्त मोठ्या जंगी कुस्त्यांचा आखाडा भरविण्यात आला होता यावेळी सोनाई कुस्ती केद्रांतील संतोष जगताप याने पुण्याचा भुषण शिवतारे या मल्याल्या चितपट करून जयभवानीगड केसरी किताब, चांदीची गदा, रोख रक्कम स्वरूपात बक्षीस पटकावले. यावेळी विशेष म्हणजे मुलींनी सुद्धा सहभाग घेतला होता. 

कराड येथील बॅन्ड पथकाने दिवसभर यात्रेला येणाऱ्या भाविकांचे जंगी स्वागत करण्यात येत होते. या यात्रेला देवीचा नवस फेडण्यासाठी पुणे, सोलापूर, कोल्हापूर, सांगली, सातारा या ठिकाणावरुन हजारो मोठ्या संख्येने भाविक दर्शनासाठी आले होते. यावेळी गावातील या परिसरातील सर्वच मान्यवर उपस्थित होते.