पुणे - अमली पदार्थ तस्कर ललित पाटील ससून रुग्णालयातून पसार झाल्यानंतर तो श्रीलंकेत पळून जाण्याच्या तयारीत होता, अशी माहिती समोर आली आहे. ललित सध्या पुणे पोलिसांच्या ताब्यात असून, त्याची कसून चौकशी करण्यात येत आहे. तर, ललितचा भाऊ भूषण पाटील आणि अभिषेक बलकवडे या दोघांना चौकशीसाठी मुंबई पोलिसांकडे सोपविण्यात आले आहे.

मेफेड्रॉन तस्कर प्रकरणातील मास्टरमाईंड ललित अनिल पाटील, शिवाजी शिंदे आणि राहुल शंकर चौधरी (सर्व रा. नाशिक) या तिघांना मुंबई येथील न्यायालयीन कोठडीतून पुणे पोलिसांनी ताब्यात घेतले होते. त्यानंतर न्यायालयाने बुधवारी (ता. १) ललितसह तिघांना सात दिवसांची पोलिस कोठडी सुनावली. चौकशीत धक्कादायक बाबी समोर येण्याची शक्यता आहे. परंतु पोलिसांनी याबाबत माहिती देण्यास नकार दिला.

दरम्यान, ललित ससूनमधून पळाल्यानंतर रावेत, तेथून मुंबईला गेल्यानंतर नाशिकला गेला. त्याने नाशिकमधून मैत्रिणींकडून २५ लाख रुपये घेतले. त्यानंतर तो श्रीलंकेला जाण्याच्या तयारीत होता. त्यासाठी तो चेन्नईत गेला होता. चेन्नइमार्गे श्रीलंकेला जाण्याच्या तयारीत असताना मुंबई पोलिसांनी त्याला पकडले होते.

या गुन्ह्यात मुख्य आरोपी ललित पाटील याच्यासह आतापर्यंत १४ आरोपी निष्पन्न झाले आहेत. त्यापैकी ११ आरोपींना अटक झाली आहे. ललित, भूषण पाटील आणि अभिषेक बलकवडे यांनी इतर आरोपींच्या मदतीने नाशिकमध्ये अमली पदार्थाचा कारखाना सुरू केला. पुणे पोलिसांनी आरोपींच्या ताब्यातून आत्तापर्यंत २ कोटी १४ लाखांचे मेफेड्रोन, एक कोटी ८० लाखांचे तीन किलो सोने, दोन मोटारी असा मुद्देमाल जप्त केला आहे.

आता मुंबई पोलिस करणार भूषण, अभिषेकची चौकशी

भूषण पाटील आणि अभिषेक बलकवडे या दोघांना पुणे पोलिसांनी नेपाळ सीमेवरून अटक केली होती. हे दोघे न्यायालयीन कोठडीत आहेत. मुंबई येथील साकी नाका पोलिसांनी या दोघांना चौकशीसाठी ताब्यात घेतले आहे. न्यायालयीन प्रक्रिया पूर्ण करून दोघांना बुधवारी रात्री मुंबईला नेण्यात आल्याची माहिती पोलिसांनी दिली.