लालूंच्या विरोधातील खटल्याच्या
सुनावणीला स्थगिती नाही
सकाळ न्यूज नेटवर्क
नवी दिल्ली, ता. ५ : आयआरसीटीसी हॉटेल गैरव्यवहारप्रकरणी विशेष न्यायालयात सुरु असलेल्या लालूप्रसाद यादव यांच्या विरोधातील खटल्याच्या सुनावणीला स्थगिती देण्यास दिल्ली उच्च न्यायालयाने नकार दिला आहे. राजदचे नेते लालू यादव यांच्याविरोधात गुन्हेगारी कट रचणे तसेच भ्रष्टाचाराच्या कलमाअंतर्गत विशेष न्यायालयाने आरोपांची निश्चिती केली होती. त्याला यादव यांनी उच्च न्यायालयात आक्षेप घेतला होता.
आयआरसीटीसी गैरव्यवहार प्रकरणात लालू यांच्यासह त्यांच्या पत्नी राबडी देवी, पुत्र तेजस्वी यादव आणि अन्य ११ जणांविरोधात कनिष्ठ न्यायालयाने गत ऑक्टोबर महिन्यात आरोपांची ​निश्चिती केली होती. अन्य आरोपींमध्ये प्रदीप गोयल, राकेश सक्सेना, भूपेंद्र अग्रवाल, राकेश गोगिया, विनोद अस्थाना, विजय आणि विनय कोचर, सरला गुप्ता, प्रेमचंद गुप्ता तसेच मेसर्स लारा प्रोजेक्ट्स एलएलपी यांचा समावेश आहे. लोकप्रतिनिधी पदाचा दुरुपयोग करणे व भ्रष्टाचार करण्यासंदर्भातील कलम १३ (२) आणि १३ (१) डी (१) आणि (२) अंतर्गत लालूप्रसाद यादव यांच्याविरोधात आरोपांची निश्चिती करण्यात आली होती. दरम्यान, यादव यांच्या याचिकेवरुन उच्च न्यायालयाने सीबीआयला नोटीस जारी केली असून या प्रकरणाची पुढील सुनावणी १२ जानेवारी रोजी होईल.