मंचर - चांडोली खुर्द (ता. आंबेगाव) येथे बुधवारी (ता. १५) दुचाकीवरून जात असताना भरत गोविंद राऊत (वय-५३ रा. पेठ, ता. आंबेगाव) व त्याची पत्नी रचना राऊत (वय-४३) व मुलगा समर्थ राऊत (वय-११) यांच्यावर बिबट्याने हल्ला केला. त्यामध्ये भरत राऊत हे जखमी झाले. बिबट्या पुन्हा पाठलाग करत होता. पण प्रसंगावधान राखून व धाडस दाखवूनरचना राऊत यांनी हातातील बॅग बिबट्याच्या तोंडावर मारल्याने हे कुटुंब बिबट्याच्या तावडीतून वाचले आहे.

पेठ येथून चुलत भावाच्या वडिलांच्या वर्षश्राद्धसाठी राऊत हे त्याच्या पत्नी व मुलासह रात्री दुचाकीवरून चांडोली खुर्द गावाकडे जात होते. चांडोली फाटा येथे रस्त्याच्या शेजारील उसाच्या शेतातून अचानक आलेल्याबिबट्याने हल्ला केला. भरत राऊत यांच्या पायावर पंजा मारल्याने ते जखमी झाले आहेत.

त्यांनी प्रसंगावधान दाखवत दुचाकी जोरात पळवली. तेव्हा काही वेळ बिबट्याने त्यांचा पाठलाग केला. त्यांची पत्नी दुचाकीच्या मागे बसली असता तिने प्रसंगावधान दाखवत हातातील बॅग बिबट्याच्या तोंडावर फेकून मारली. त्यामुळे बिबट्या दबकला मात्र तो त्यांचा हळूहळू पाठलाग करत होता. त्याचवेळी रस्त्यावरून मागून येणाऱ्या स्कॉर्पिओ गाडीची लाईट चमकल्याने बिबट्या पळून गेला.

भरत राऊत यांनी त्यांचा भाऊ राहुल राऊत याला फोन करून घटनेची माहिती दिली त्यांनी घटनास्थळी येवून भरत राऊत यांना मंचर येथील उपजिल्हा रुग्णालयात उपचारासाठी दाखल केले आहे. रुग्णालय प्रशासनाने याबाबत वनविभागाचे अधिकारी यांना कळवळे आहे. दरम्यान भरत राऊत हे कुटुंबातील कमावती व्यक्ती असून वनविभागाने अधिकारी यांनी योग्य तो पाठपुरावा करून त्यांना मदत मिळवून द्यावी. अशी मागणी भरत राऊत यांच्या कुटुंबियांनी केली आहे.