इंदापूर - इंदापूर नगरपरिषद सार्वत्रिक पंचवार्षिक निवडणूक २०२२ आरक्षण सोडत नगरपरिषदेच्या नवीन प्रशासकीय भवन येथे सोमवार दि. १३ जून रोजी उपजिल्हाधिकारी भाऊसाहेब गलांडे यांच्या अध्यक्षतेखाली काढण्यात आली. तहसीलदार श्रीकांत पाटील, नगरपरिषद मुख्याधिकारी रामराजे कापरे, सभा अधीक्षक गजानन पुंडे, भरत शहा, अशोक इजगुडे, शकील सय्यद, बाळासाहेब ढवळे, प्रा. कृष्णाजी ताटे, शिवाजी मखरे, संदीपान कडवळे, अनिल पवार, सागर पवार, महादेव लोखंडे यावेळी उपस्थित होते. यावेळी अनुसूचित जाती आरक्षण सोडतीत तीन राखीव जागांसाठी चैतन्य राजेंद्र धोत्रे या विद्यार्थ्यांच्या हातून सोडतीच्या चिठ्ठया काढण्यात आल्या.

इंदापूर नगरपरिषदेचे प्रभाग क्रमांक १, ९, १० अनुसूचित जाती साठी आरक्षित असून त्यापैकी १ अ व ९ अ हे अनुसूचित महिला आरक्षित झाले आहे तसेच सर्वसाधारण महिलांसाठी २ अ,३ अ,४ अ,५ अ,६ अ,७ अ,८ अ,१० ब आरक्षित झाले आहेत. इंदापूर नगरपरिषदेच्या १० प्रभागातील एकूण २० जागांपैकी १० जागा महिलांसाठी राखीव असतील.

या आरक्षण सोडती नुसार निम्म्या जागा महिलांसाठी आरक्षित झाल्या आहेत मात्र सर्व साधारण जागेवरून सुद्धा महिला उभ्या राहू शकतात. त्यामुळे यंदा पुन्हा नगरपरिषदेवर महिला राज येण्याची शक्यता आहे. यंदा नगराध्यक्षपदी निवडून येण्यासाठी जनते ऐवजी नगरसेवकांमधून संधी मिळणार असल्याने नगरसेवकांना महत्त्व प्राप्त झाले आहे. यासंदर्भात नगरपरिषद सत्ताधारी गटाचे प्रमुख भरत शहा म्हणाले,या सोडतीचा फायदाआम्हाला होणार आहे कारण आम्ही प्रामाणिकपणे पाच वर्ष जनतेची सेवा केली आहे. त्यामुळे जनतेचा आमच्यावर विश्वास आहे.

राष्ट्रवादी काँग्रेसचे शहराध्यक्ष बाळासाहेब ढवळे म्हणाले, सामान्य प्रशासन राज्य मंत्री दत्तात्रय भरणे, राष्ट्रवादी काँग्रेसचे जिल्हाध्यक्ष प्रदीप गारटकर यांच्या माध्यमातून शहरात कोट्यावधी रुपयांची कामे झाली आहेत. त्यात आरक्षण देखील व्यवस्थित पडले आहे. त्यामुळे यंदा नगरपरिषदेवर निश्चित आमचीच सत्ता येणार आहे.