कडूस, ता. २५ :  खेड तालुक्यातील गारगोटवाडीत मॉर्निंग वॉकला गेलेल्या तरुणावर बिबट्याने हल्ला केल्याने परिसरात प्रचंड दहशत पसरली आहे. काशिनाथ भांगे असे या तरुणाचे नाव असून, दैव बलवत्तर म्हणून तो बचावला. या घटनेमुळे नागरिकांच्या जीविताचा प्रश्‍न ऐरणीवर आला असून, कुंभकर्णी झोपेत असलेल्या वनविभागाने तत्काळ बंदोबस्त करावा, अशी मागणी जोर धरत आहे.
गारगोटवाडी येथील काशिनाथ भांगे हे आज सकाळी सहाच्या सुमारास मुसळेवाडी रस्त्यावर मॉर्निंग वॉकसाठी गेले होते. या वेळी समोरून काळ बनून आलेल्या बिबट्याला पाहून ते झाडाआड लपले. बिबट्या गेल्याचा समज होताच त्यांनी घराकडे धाव घेतली, मात्र दबा धरून बसलेल्या बिबट्याने डरकाळी फोडत त्यांचा पाठलाग सुरू केला.
जीव वाचविण्यासाठी धावताना भांगे जमिनीवर कोसळले. बिबट्याने त्यांच्या पायावर झडप घालण्याचा प्रयत्न करताच त्यांनी आरडाओरडा केला. आवाज ऐकून लक्ष्मण भांगे मदतीला धावल्याने बिबट्याने बाजूच्या झाडीत धूम ठोकली. या थरारक घटनेमुळे परिसरात संतापाची लाट उसळली असून, वनविभागाने केवळ कागदी घोडे न नाचवता बिबट्याचा तत्काळ बंदोबस्त करावा; अन्यथा होणाऱ्या परिणामांना विभागच जबाबदार राहील, असा संतप्त इशारा ग्रामस्थांनी दिला आहे.