पुणे - नोंदणी होण्यापूर्वीच वाहन ग्राहकाच्या ताब्यात दिल्याबद्दल शहरातील 10 वितरकांची नोंदणी प्रमाणपत्रे प्रादेशिक परिवहन कार्यालयाने (आरटीओ) 7 दिवसांसाठी निलंबित केली.

वाहनांची नोंदणी होण्यापूर्वी ते वाहन ग्राहकांच्या ताब्यात देण्याचे प्रकार सध्या वारंवार घडत आहेत. याबाबत आरटीओ कार्यालयाकडे तक्रारी झाल्या होत्या. तसेच, नोंदणी न केलेल्या वाहनांचे अपघात झाल्यावर विमाविषयक प्रश्न उद्भवत असल्याचे दिसून आले होते. या पार्श्वभूमीवर आरटीओ कार्यालयाने तपासणी केली. त्यात दुचाकीच्या 9 आणि एका रिक्षा वितरकाने नोंदणी करण्यापूर्वीच वाहन ग्राहकांच्या ताब्यात दिल्याचे दिसून आले. त्यामुळे प्रादेशिक परिवहन अधिकारी बाबासाहेब आजरी, उपप्रादेशिक अधिकारी संजय राऊत यांनी संबंधित वितरकांवर कारवाई केली. त्यांना खुलासा सादर करण्याचे आदेशही देण्यात आले आहेत. या पुढील काळातही अशी कारवाई सुरू राहणार असल्याचे राऊत यांनी स्पष्ट केले आहे.