Baramati Lok Sabha Election Latest News : लोकसभा निवडणुकीच्या तिसऱ्या टप्प्याच्या प्रचाराचा आज शेवटचा दिवस आहे. या टप्प्यात संपूर्ण देशाचे लक्ष लागलेल्या बारामती लोकसभा मतदारसंघात मतदान होणार आहे. दरम्यान आज बारामतीच राष्ट्रवादीच्या दोन्ही गटांच्या प्रचार सभा पार पडल्या. यावेळी राष्ट्रवादी काँग्रेस शरदचंद्र पवार पक्षाच्या जाहीर सभेत बोलताना पक्षाचे नेते रोहित पवार भावनिक झाल्याचे पाहायला मिळाले.

रोहित पवार म्हणाले की, जेव्हा पक्ष फुटला तेव्हा मी आणि काही पदाधिकारी साहेबांसोबत बसलो होतो. साहेबांशी (शरद पवार) आम्ही चर्चा करत होतो. ते टीव्हीकडे बघत होते. त्यांनी चेहऱ्यावर दाखवलं नाही. त्यांना आम्ही काही प्रश्न विचारले त्यांनी उत्तरं दिली. बाहेर जाताना त्यांनी आम्हाला सांगितलं की, तुम्ही अजिबात काळजी करू नका, हा आपला स्वाभिमानी महाराष्ट्र आपल्याला घडवायचा आहे. तो घडवण्यासाठी आपल्याला नवीन पिढीला ताकद द्यायची आहे. जोपर्यंत नवी पिढी जबाबदारी घेण्याच्या पातळीची होत नाही तोपर्यंत मी माझे डोळे मिटणार नाही, असे पवार साहेबांचे शब्द होते.

असे म्हणताच रोहित पवारांना स्टेजवर अश्रू अनावर झाल्याचे पाहायला मिळालं. डोळ्यात पाणी आलेले असताना रोहित पवार समोर बसलेल्या शरद पवारांना उद्देशून म्हणाले की, साहेब तुम्हाला विनंती करतो की हे वक्तव्य तुम्ही केलं ते कृपा करून पुन्हा करू नका. तुम्ही आमचा जीव, आत्मा आहात. जे लोकं तुम्हाला त्रास देतात, ते मोठे नेते काहीही बोलले तरी सामान्य जनता आणि पवार कुटुंब तुमच्याबरोबर आहे, असेही रोहित पवार यावेळी म्हणाले.