पुणे - शहरात ईव्हीएम मशिनमध्ये कोठेही बिघाड झाला नाही; परंतु पाच मतदान केंद्रांवर व्हीव्हीपॅट मशिन नादुरुस्त झाल्याच्या तक्रारी प्राप्त झाल्या. परंतु अर्ध्या तासात तेथील मशिन बदलण्यात आल्या, अशी माहिती जिल्हा निवडणूक अधिकारी नवल किशोर राम यांनी दिली. मागील पुणे लोकसभा निवडणुकीच्या तुलनेत यंदा मतदानाची टक्केवारी वाढेल, अशी अपेक्षा होती. यापुढील काळात मतदानवाढीसाठी आणखी प्रयत्न करण्यात येतील, असे त्यांनी स्पष्ट केले.
पुणे आणि बारामती लोकसभा मतदारसंघात मतदान पार पडल्यानंतर मंगळवारी पत्रकार परिषदेत राम यांनी ही माहिती दिली. निवासी उपजिल्हाधिकारी डॉ. जयश्री कटारे, उपजिल्हा निवडणूक अधिकारी मोनिका सिंह आदी या वेळी उपस्थित होते. राम म्हणाले, ‘‘पुणे लोकसभा मतदारसंघात मागील निवडणुकीत ५४ टक्के मतदान झाले होते. त्यात वाढ होण्याच्या उद्देशाने ‘स्वीप’अंतर्गत मतदार जागृती अभियान राबविण्यात आले. त्यामुळे यंदा मतदानाची टक्केवारी ६० टक्क्यांपर्यंत जाईल, असे वाटत होते. आपण कोठे कमी पडलो, याचा विचार करावा लागेल.’’
पुणे कॅंटोन्मेंटमधील दहा हजार मतदारांची नावे यादीतून वगळण्यात आली होती. त्यात स्थलांतरित, दुबार नावे आणि मृत मतदारांचा समावेश होता, दिवसभरात ३० ते ३५ तक्रारी प्राप्त झाल्या. कसबा पेठेतील शिवाजी मराठा हायस्कूल मतदान केंद्रावर एका निवडणूक कर्मचाऱ्याने विशिष्ट पक्षाला मतदान करा, असे आवाहन केल्याबाबत विरोधकांनी तक्रार केल्याची चर्चा होती.
या संदर्भात राम म्हणाले, ‘‘याबाबत पोलिसांनी कोणालाही ताब्यात घेतलेले नाही. याप्रकरणी लेखी तक्रार प्राप्त झाल्यास चौकशी करून दोषींवर कारवाई करण्यात येईल.’
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.