पुणे - जास्तीत जास्त नागरिकांपर्यंत काही क्षणांत पोचायचे असेल, तर विविध सोशल मीडियाचा वापर हा एक चांगला पर्याय उपलब्ध आहे. निवडणूक काळात या माध्यमांचा वापर करून उमेदवार मतदारांपर्यंत पोचतात. मात्र, तरीही प्रचारगीते आणि विकासकामांची माहिती देणारे ऑडिओ बनविण्याचे प्रमाण कमी झालेले नाही.    

विविध पक्षांच्या पहिल्या टप्प्यातील याद्या जाहीर झाल्या आहेत. तिकीट मिळालेल्या उमेदवारांची प्रचाराची लगबग सुरू आहे. त्यासाठी नवनवीन युक्‍त्या वापरल्या जात आहेत. मतदारांना आकर्षित करण्यासाठी प्रचारगीतांवर भर असतो. सध्या गाजत असलेल्या मराठी गाण्यांच्या चालींद्वारे प्रचारगीतांना उमेदवारांची पसंती आहे. प्रसिद्ध गाण्यांच्या चालींवर गाणे बसविल्यास किंवा चांगला संदेश व आश्‍वासने देणारे एखादी ऑडिओ क्‍लिफ असेल तर ती मतदारांना आकर्षित करते. त्यामुळे उमेदवारांची मागणी अशा गीतांना असते. प्रचारगीतांसाठी राष्ट्रीय पक्षांकडून मोठा खर्च करण्यात येतो. त्यासाठी गायक, लेखकदेखील निवडण्यात आले आहेत. प्रचारगीतांतील मजकूर काय असावा, यावरही भर दिला जात आहे.

नागरिकांपर्यंत जाणाऱ्या बाबी या सोप्या व नेमकेपणाने मांडलेल्या असाव्यात, अशी अपेक्षा उमेदवारांची असते. स्थानिक पक्षही या सर्वांत मागे नाहीत. पालिका आणि विधानसभा निवडणुकीवेळी अशी गाणी मोठ्या प्रमाणात बनविण्यात आली होती, अशी माहिती स्टुडिओ व्यावसायिक मिलिंद जोशी यांनी दिली. 

उडत्या चालींवरील गाणी नागरिकांच्या लक्षात राहतात. त्यामुळे त्या चालींचा आधार घेतला जातो. गेल्या विधानसभा निवडणुकीत ‘मला आमदार झाल्यासारखे वाटतेय’, ‘माऊली माऊली...’ अशी गीते खूप चालली. त्यासाठी जास्त काही खर्च येत नाही. अनेकांना प्रचारगीतांमुळे रोजगारही मिळतो.
- राहुल झेंडे, व्हिडिओ एडिटर