पीएमपीच्या ३६१ बस निवडणुकीसाठी; दोन दिवस प्रवाशांची गैरसोय
पुणे - लोकसभा निवडणुकीच्या मतदानाच्या दिवशी आणि त्या पूर्वी एक दिवस, पीएमपीच्या ३६१ बस जिल्हा निवडणूक आयोगाला द्याव्या लागणार आहेत. त्यामुळे शहर आणि पिंपरी- चिंचवडमधील प्रवाशांसाठी ते दोन दिवस फक्त १२०० बस उपलब्ध होणार आहेत. त्यामुळे त्यांची काही प्रमाणात गैरसोय होण्याची शक्यता आहे.
लोकसभा निवडणुकीसाठी २३ एप्रिल रोजी मतदान होणार आहे. तत्पूर्वी मतदानाच्या तयारीसाठी एक दिवस अगोदर पीएमपीला ३६१ बस प्रशासनाला उपलब्ध करून द्याव्या लागणार आहेत.
मतदानाच्या दिवशीही मतदान कर्मचाऱ्यांची आणि साहित्याची वाहतूक करण्यासाठी ३६१ बस लागणार असल्याचे जिल्हा निवडणूक आयोगाने पीएमपीला कळविले आहे. त्यानुसार पीएमपी प्रशासनाने तयारी केली आहे. पीएमपीकडे सध्या सुमारे २ हजार बस आहेत. त्यातील १५५० बस सुमारे ३४० मार्गांवर धावतात. त्यातून दररोज ११ लाख प्रवाशांची वाहतूक होते.
पीएमपीच्या ताफ्यातील सुमारे ४५० बस नादुरुस्त आहेत. त्यातील अनेक बसचे आयुर्मान संपले आहे. त्यामुळे या बस दुरुस्त करून मार्गावर आणण्यावर मर्यादा आहेत. तरीही मतदानादरम्यान दोन दिवस लागणाऱ्या जादा बसची आवश्यकता लक्षात घेऊन जास्तीत बस उपलब्ध करून देण्यात येतील, असे पीएमपीच्या वाहतूक विभागाने प्रशासनाला कळविले आहे.
निवडणुकीच्या कामांसाठी बस द्याव्या लागणार असल्या, तरी प्रवाशांची गैरसोय होणार नाही, याकडे प्रशासनाचे लक्ष आहे. मतदानादरम्यानच्या दोन्ही दिवशी बंद बसपैकी जास्तीत जास्त बस मार्गावर आणणार असून, त्यासाठी युद्धपातळीवर प्रयत्न सुरू आहेत.
- नयना गुंडे, अध्यक्षा, पीएमपी
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.