पुणे - शिक्षण आणि रोजगाराच्या प्रश्नावर छात्रभारती विद्यार्थी संघटना आणि राष्ट्र सेवा दलाच्या वतीने महात्मा फुले वाड्यातून गुरुवारी लाँग मार्चला सुरवात झाली. सरकारने शाळा बंद करण्याचे धोरण अवलंबिले, अवैज्ञानिक अभ्यासक्रम तयार करणे, आदिवासी - मागासवर्गीय विद्यार्थ्यांच्या शिष्यवृत्ती बंद करणे, शिक्षक भरतीसह संपूर्ण नोकरभरती बंद करणे याविरोधात हा लाँग मार्च मुंबईत मंत्रालय येथे धडकणार आहे. 

‘‘शिक्षण आमच्या हक्काचे नाही कोणाच्या मालकीचे’, ‘के जी टू पीजी मोफत शिक्षण मिळालेच पाहिजे,’ अशा घोषणा देत राज्याच्या कानाकोपऱ्यातून आलेले विद्यार्थी या मोर्च्यात सहभागी झाले होते. मोर्च्यामध्ये विद्यार्थिनींची उपस्थिती मोठ्या प्रमाणात होती. डॉ. बाबा आढाव, पन्नालाल सुराणा, सुरेश खैरनार, आमदार कपिल पाटील, आमदार सुधीर तांबे, जे. यू. नाना ठाकरे, सुभाष वारे, नगरसेविका अश्‍विनी कदम, अल्लाऊद्दीन शेख, विनय सावंत, संदेश भंडारे, जाकीर अत्तर, प्रमोद दिवेकर आदी उपस्थित होते. आदिवासी वसतिगृहातील विद्यार्थी व पुण्यात स्पर्धा परीक्षांची तयारी करणाऱ्या विद्यार्थ्यांनी मोठ्या संख्येने उपस्थित राहून पाठिंबा दिला. या मोर्च्याचे संपूर्ण नियोजन दत्ता ढगे, लोकेश लाटे, रशीद मणियार, शिवराज सूर्यवंशी, प्रशांत दांडेकर, संदीप आखाडे, राकेश पवार, सागर भालेराव, कीर्ती इटकर, अनिकेत घुले यांनी केले आहे.