बिबवेवाडी(पुणे) : दुचाकीवर आलेल्या चोरट्यांनी एकाला कोयत्याचा धाक दाखवून पावणेपाच लाख रुपयांची कॅश लुबाडून नेली. मार्केटयार्ड परिसरात मंगळवारी दुपारी पावणेबाराच्या सुमारास ही घटना घडली. भरदिवसा घडलेल्या या घटनेमुळे खळबळ उडाली आहे.

गंगाधाम चौकातील कोंढवा रस्त्यावर पटेल पेट्रोल पंप आहे. तेथे दररोज जमा झालेली रक्‍कम स्टेट बॅंक ऑफ इंडियाच्या मार्केटयार्ड शाखेत जमा केली जाते. नेहमीप्रमाणे दुपारी तेथील एक कर्मचारी ऍक्‍टिव्हा दुचाकीवर बॅंकेत रक्‍कम भरण्यासाठी जात होता. त्यावेळी दुचाकीवर आलेल्या चोरट्यांनी कर्मचाऱ्याच्या अंगावर दुचाकी घालण्याचा प्रयत्न केला. त्यावर दुचाकी थांबविल्यानंतर एका चोरट्याने कर्मचाऱ्यास कोयत्याचा धाक दाखविला. त्यावर कर्मचाऱ्याने आरडाओरडा केला. परंतु रक्‍कम लुटून चोरटे मार्केटयार्डच्या
दिशेने पसार झाले.

बॅगेत चार लाख 74 हजार 280 इतकी रक्‍कम होती. चोरट्यांनी जर्कीन घातलेली होती. या घटनेनंतर परिमंडळ पाचचे सहायक पोलिस आयुक्‍त मिलिंद पाटील आणि मार्केट यार्डचे पोलिस निरीक्षक दुर्योधन पवार यांनी घटनास्थळी धाव घेतली. पोलिसांकडून घटनास्थळावरील सीसीटीव्ही फुटेज तपासण्यात येत आहे. याप्रकरणी पेट्रोल पंपाचे व्यवस्थापक अहमद हुसेन शेख (वय 64, रा. कोंढवा) यांनी मार्केटयार्ड पोलिस ठाण्यात तक्रार दिली आहे.