पुणे - आगामी महापालिका आणि नगरपालिका निवडणुकादेखील महाविकास आघाडी एकत्रित लढविणार आहे, अशा शब्दांत कॉंग्रेसचे प्रदेशाध्यक्ष आणि महसूलमंत्री बाळासाहेब थोरात यांनी कॉंग्रेस पक्षाची पुढील दिशा स्पष्ट केली. जेथे जेथे भाजपला बाजूला ठेवणे शक्‍य आहे, तेथे भाजपला बाजूला ठेवण्याचा प्रयत्न केला जाईल, असेही ते म्हणाले. 

ताज्या बातम्यांसाठी डाऊनलोड करा ई-सकाळचे ऍप

महसूलमंत्री झाल्यानंतर थोरात प्रथमच कॉंग्रेस भवन येथे आले होते. शहर कॉंग्रेसच्या वतीने त्यांचा सत्कार करण्यात आला. त्या वेळी पत्रकारांशी अनौपचारिक गप्पा मारताना त्यांनी ही माहिती दिली. महाविकास आघाडी सरकारमधील किमान समान कार्यक्रम, कॉंग्रेसपुढील अडचणी, महसूलमंत्री या नात्याने सुरू असलेले काम आदी विषयांवर त्यांनी मनमोकळ्या गप्पा मारल्या. राज्यात नुकत्याच सहा जिल्हा परिषदांच्या निवडणुका झाल्या. या निवडणुका महविकास आघाडीच्या माध्यमातून कॉंग्रेस, राष्ट्रवादी कॉंग्रेस आणि शिवसेनेने एकत्र येत लढविल्या होत्या. त्यावर थोरात म्हणाले, ""आगामी निवडणुकाही महाविकास आघाडीच्या माध्यमातून लढविणार आहोत.'' 

भाजपला "ग'ची बाधा झाली आहे. कॉंग्रेसला विरोधी पक्षनेतेपदसुद्धा मिळणार नाही, असा दावा भाजपकडून केला जात होता. प्रत्यक्षात मात्र त्यांच्यावर विरोधात बसायची वेळ आली, असे सांगून थोरात म्हणाले, ""कॉंग्रेस हा शाश्‍वत विचार आहे. विचार कधी संपत नाही. सध्या पक्षापुढे काही अडचणी आहेत. संघटनात्मक बांधणीचे काम सुरू आहे. यूथ आणि महिला कॉंग्रेसमध्ये चांगल्या पद्धतीने काम सुरू आहे. कोकण आणि मुंबईत कॉंग्रेसला खूप काम करावे लागणार आहे. तेथे पोकळी आहे.'' 

सातबारासंदर्भात महत्त्वाचा निर्णय लवकरच 
ऑनलाइन सातबारा उतारा, ई-सर्च असे नवीन प्रकल्प महसूल खात्यात राबविल्याचे सांगून थोरात म्हणाले, ""हे प्रकल्प आता पूर्ण झाले आहेत. त्यामुळे कामकाजासाठी सरकारच्या कोणत्याही खात्याने शेतकऱ्यांकडे सातबारा उतारा मागू नये, यासंदर्भातील निर्णय लवकरच घेणार आहोत. त्या खात्याने ऑनलाइन तो उपलब्ध करून द्यावा, असा प्रस्ताव तयार करून लवकरच त्याला मान्यता देण्यात येईल.''