भाळवणीतील एकावर
ॲट्रॉसिटीअंतर्गत गुन्हा

मंगळवेढा, ता. २४ : शेळ्या सोडण्यावरून झालेल्या भांडणातून ‘आमच्या रस्त्याने का जातो?’ असे विचारून जातीवाचक शिवीगाळ करत काठीने मारहाण करून जखमी केल्याप्रकरणी भाळवणी येथील महादेव रेवणसिद्ध साखरे यांच्याविरुद्ध ॲट्रॉसिटीअंतर्गत गुन्हा दाखल झाला आहे.
या प्रकरणी अगतराव पांडुरंग गेजगे (वय ८१, रा. भाळवणी) यांनी फिर्याद दिली आहे. त्यानुसार, सुमारे महिनाभरापूर्वी महादेव रेवणसिद्ध साखरे यांनी त्यांच्या शेतात शेळ्या सोडल्याच्या कारणावरून भांडण झाले होते.
दरम्यान, काल सकाळी दहाच्या सुमारास गेजगे हे समाधान कोडग यांच्या शेतातील सार्वजनिक कच्च्या रस्त्याने सायकलवरून भाळवणी गावाकडे जात होते. त्यावेळी रस्त्यात महादेव साखरे यांनी ‘तुम्ही आमच्या रानातील रस्त्याने का चालला?’ असे विचारून ‘आत्ता तुझे बघतोच म्हणत साखरे यांनी काठीने त्यांच्या डाव्या हाताच्या पोटरीवर मारून जखमी केले. तसेच, ‘तू माझ्याविरुद्ध पोलिस ठाण्यात तक्रार दिली तर मी तुझ्याविरुद्ध पोलिस ठाण्यात खोटी तक्रार देईन,’ अशी धमकी दिल्याचे फिर्यादीत नमूद आहे. त्यावरून महादेव रेवणसिद्ध साखरे यांच्याविरुद्ध ॲट्रॉसिटीअंतर्गत गुन्हा दाखल झाला आहे.