बारामती : कार्यकर्त्याचं मन राखण्यासाठी विरोधी पक्ष नेते अजित पवार (Ajit Pawar) यांनी व्यस्त कार्यक्रमातूनही आवर्जून दहा मिनिटं काढत आपल्यासाठी कार्यकर्ते जिवाभावाचेच आहेत, हे दाखवून दिलं.

महाराष्ट्र दिनी (Maharashtra Day) प्रशासकीय इमारतीत ध्वजारोहणासाठी निघालेले असताना सुहास मढवी या कार्यकर्त्यानं माझ्या दुकानात मी सेकंडहँड झेरॉक्स मशीन (Xerox Machine) घेतलं आहे, त्याची झेरॉक्सची पहिली प्रत तुम्ही काढावी अशी माझी इच्छा आहे, असं सांगितलं. अजित पवार यांनीही क्षणाचा विलंब न लावता त्याला होकार देत त्याच्या दुकानाकडं मोर्चा वळविला.

नगरपालिका उदयोग भवनात छोट्याशा गाळ्यात सुहास यानं सेकंडहँड झेरॉक्सचं मशीन घेत आपला उदरनिर्वाह सुरु केला आहे. पवार यांनीही त्याच्या इच्छेप्रमाणं पहिली प्रत काढून त्याला चांगला व्यवसाय करण्यासाठी प्रोत्साहन दिलं. त्या कार्यकर्त्याची त्यांनी आस्थेवाईकपणे चौकशीही केली.

जिवाभावाच्या कार्यकर्त्यांच्या जोरावरच माझं राजकारण चालतं, हे अजित पवारांनी या छोट्याशा भेटीतून दाखवून दिलं. युवकाध्यक्ष अविनाश बांदल व माजी उपनगराध्यक्ष अभिजीत जाधव हेही या प्रसंगी उपस्थित होते.