पिरंगुट, ता. १६ : पुणे जिल्हा कुस्तीगीर तालीम संघाच्या मान्यतेने भुकूम (ता. मुळशी) येथील स्वयंभू रामेश्वर क्रीडा नगरीत शनिवार (ता. १७) व रविवारी (ता. १८) महाराष्ट्र केसरी कुस्तीसाठीच्या तालुका निवड स्पर्धेचे आयोजन केले आहे. स्पर्धेचे आयोजन भुकूम ग्रामस्थ करणार असल्याची माहिती मुळशी तालुका कुस्तीगीर तालीम संघाचे अध्यक्ष गोविंद आंग्रे यांनी दिली. येथील रामेश्वर मंदिरासमोर ग्रामस्थांच्या वतीने दहा हजार प्रेक्षक क्षमतेचे तात्पुरते स्टेडियम उभारले आहे.
५७, ६१, ६५, ७०, ७४, ७९, ८६, ९२, ९७ किलो या वजनी गटात आणि महाराष्ट्र केसरी गटासाठी दुचाकींची बक्षीसे ठेवण्यात आली असून, बालगटामध्ये २५, २८, ३२, ३६, ४०, ४४, ४८, ५१, ५५ आणि ६० किलो गटातील पहिल्या १० विजेत्यांसाठी सायकली, चषक आणि रोख रक्कमेची बक्षिसे ठेवली आहेत. स्वर्गीय किरण विजय माझिरे यांच्या स्मरणार्थ ॲड. भरत माझिरे यांच्याकडून गादी आणि माती विभागाच्या दोन्हीही पहिलवानांना चांदीची गदा देण्यात येणार आहे. माजी उपसरपंच स्वर्गीय संजय किसन माझिरे यांच्या स्मरणार्थ युवा सरपंच किताब माऊली कोकाटे विरुद्ध सोनू ग्रेलवाल यांच्या निकाली कुस्तीसाठी तुषार माझिरे यांच्या वतीने पाच लाख रुपये रोख व चांदीची गदा विजेत्यास मिळणार आहे. कै. पद्माकर चोंधे यांच्या स्मरणार्थ विशाल चोंधे यांच्याकडून चांदीची गदा येणार आहे.