सकाळ वृत्तसेवा
पिंपरी, ता. २२ ः महाराष्ट्र राज्य मार्ग परिवहन महामंडळाने (एसटी) प्रासंगिक करारावर दिल्या जाणाऱ्या बसच्या भाड्यात वाढ केली. यात सर्वाधिक वापरल्या जाणाऱ्या साध्या बसच्या भाड्यात प्रति किलोमीटर ११ ते १९ रुपयांची भाडेवाढ झाली. त्यामुळे शाळा-महाविद्यालयांच्या सहली, लग्नसोहळे, यात्रा तसेच पर्यटनासाठी एसटी भाड्याने घेणाऱ्या सामान्य प्रवाशांना आणखी झळ बसेल.
जुलैमध्ये नियमित तिकीट दरात टप्पा पद्धतीनुसार पाच रुपयांच्या पटीत वाढ झाली. त्यानंतर प्रासंगिक कराराचे दरही पुनर्रचित करण्यात आले. साध्या बसच्या दुहेरी फेरीसाठी जुना दर ६४ वरुन थेट ७५ रुपये प्रति किलोमीटर झाला. एकेरी फेरीसाठी हा दर ९६ वरून ११५ रुपयांवर गेला. निमआराम बसच्या दुहेरी फेरीत प्रति किमी. तीन, तर शयनयान बसमध्ये १० रुपयांनी वाढ झाली. वातानुकूलित शिवशाही व शिवनेरीच्या दुहेरी फेरीच्या दरात बदल न करता ते अनुक्रमे ८५ व १२० रुपये प्रति किमी ठेवण्यात आले.

सहलींसाठी सवलत कायम
शैक्षणिक संस्थांना सहलींसाठी दिल्या जाणाऱ्या साध्या बसच्या ५० टक्के सवलतीत बदल झालेला नाही. मात्र जुन्या ३२ रुपये प्रति किमीच्या दरात ५.५० रुपयांनी वाढ झाली आहे. सहलीसाठी ३७.५० रुपये प्रति किमी दराने साधी बस मिळेल. उर्वरित पन्नास टक्के रकमेची प्रतिपूर्ती शासन महामंडळाला करेल.

ई-बसना प्रोत्साहन
महामंडळाने ९ मीटर आणि १२ मीटर शिवाई ई- बसच्या प्रति किमी दरात २ ते ९ रुपयांपर्यंत कपात करून पर्यावरणपूरक गाड्यांना प्रोत्साहन दिले आहे. महामंडळाने डिझेल गाड्यांचे भाडे वाढवून वाढत्या इंधन खर्चाची भरपाई केली आहे; परंतु ई-बस वापरणाऱ्या संस्था आणि प्रवाशांना सवलत देऊन विजेवरील गाड्यांच्या वापराला प्राधान्य देण्याचे धोरण आहे.
----------
दुहेरी फेरीसाठी दर
प्रकार (आसनक्षमता) ः जुना दर ः नवा दर ः बदल
साधी बस (४०-४५ आसनी) ः ६४ ः ७५ ः ११ रुपयांनी वाढ
राजमाता जिजाऊ (५६ आसनी) ः ०० ः ९० ः ००
निमआराम (४५ आसनी) ः ७७ ः ८० ः ३ रुपयांनी वाढ
शयनआसनी (४५ आसनी) ः ०० ः ८५ ः ००
शयनयान (३० आसनी) ः ७० ः ८० ः १० रुपयांनी वाढ
वातानुकूलित शिवशाही (४०/४५ आसनी) ः ८५ ः ८५ ः बदल नाही
वातानुकूलित ९ मीटर ई-बस (३५ आसनी) ः ८९ ः ८० ः ९ रुपयांनी कमी
वातानुकूलित १२ मीटर ई-बस (४०/४५ आसनी) ः १०२ ः १०० ः २ रुपयांनी कमी
---------
भाडेवाढ झाल्यामुळे प्रासंगिक कराराचे दरही पुनर्रचित करण्यात आले आहेत. शैक्षणिक संस्थांना सहलींसाठी दिली जाणारी ५० टक्के सवलत कायम ठेवण्यात आलेली आहे.
- अरुण सिया, विभाग नियंत्रक, पुणे