विधानसभा 2019 : पुणे - शहर, जिल्हा आणि पिंपरी चिंचवडमधील २१ विधानसभा मतदारसंघांवर वरचष्मा राखण्यासाठी भाजप - शिवसेना महायुती प्रयत्नशील आहे, तर काँग्रेस- राष्ट्रवादी काँग्रेस महाआघाडी अस्तित्त्वाची लढाई निकराने लढत आहे.
पालकमंत्री चंद्रकांत पाटील, राज्यमंत्री विजय शिवतारे, बाळा भेगडे यांना त्यांच्या-त्यांच्या मतदारसंघात आव्हान निर्माण झाले आहे, तर कोथरूड, इंदापूर, पुरंदर, जुन्नर, मावळ, खेड आणि चिंचवडमधील लढती आता लक्षवेधक असतील. अखेरच्या टप्प्यात होत असलेले पक्षांतर, आरोप-प्रत्यारोपांच्या फैरी, शह-काटशहाचे राजकारण यामुळे निवडणुकीचा प्रचार शिगेला पोचला आहे.
पुणे जिल्हा हा आजवर राष्ट्रवादी काँग्रेस- काँग्रेसचा बालेकिल्ला समजला जात होता. गेल्या विधानसभा निवडणुकीपासून युतीने जिल्ह्यात मुसंडी मारली, तर तो पुन्हा मिळविण्यासाठी आघाडीचा प्रयत्न सुरू आहे. शहर- जिल्ह्यात प्रचारासाठी भाजप- शिवसेनेने राष्ट्रीय नेत्यांची फळीच मैदानात उतरविली, तर आघाडीचे विविध नेतेही मतदारसंघ पिंजून काढत आहेत. मनसेचे अध्यक्ष राज ठाकरे यांनीही सभांचा धडाका लावला आहे; तर अन्य घटक पक्षही त्यांची व्होटबॅंक निर्माण करण्याच्या प्रयत्नात आहेत.
बंडखोरीचा काही ठिकाणी उपद्रव झाल्यामुळे तेथे तिरंगी, चौरंगी लढत होत आहे. प्रचाराचा शनिवार (ता. १९) हा शेवटचा दिवस आहे. त्यामुळे अंतिम टप्प्यातील प्रचारावर हुकूमत राखण्यासाठी आता खल सुरू झाला आहे.
पुण्यातील आठ विधानसभा मतदारसंघांपैकी कोथरूडमध्ये भाजपची प्रतिष्ठा पणाला लागली आहे. कारण प्रदेशाध्यक्ष चंद्रकांत पाटील हे येथे उमेदवार आहेत. विरोधकांनी एकत्र येऊन मनसेचे किशोर शिंदे यांना पाठबळ दिले.
त्यामुळे धास्तावलेल्या भाजपने विशेष यंत्रणा कोथरूडमध्ये कार्यान्वित केली; तर कसब्यात खासदार गिरीश बापट यांच्या बालेकिल्ल्यात महापौर मुक्ता टिळक यांच्यासमोर काँग्रेसचे उमेदवार अरविंद शिंदे आणि शिवसेनेचे बंडखोर उमेदवार विशाल धनवडे यांनी जोरदार प्रचार करून लढत तिरंगी केली आहे.
पिंपरी, चिंचवड, भोसरीच्या लढतीकडे लक्ष
चिंचवडमध्ये भाजपचे उमेदवार लक्ष्मण जगताप यांना आव्हान देत असलेले शिवसेनेचे बंडखोर उमेदवार राहुल कलाटे यांना राष्ट्रवादी काँग्रेसने पाठिंबा दिला. त्यामुळे या लढतीबद्दल औत्सुक्य निर्माण झाले आहे, तर पिंपरीमध्ये भाजप आणि राष्ट्रवादीत, तर भोसरीमध्ये भाजप आणि राष्ट्रवादीपुरस्कृत उमेदवारांतील सरळ लढतीबद्दल कुतूहल आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.