पुणे - सावित्रीबाई फुले विद्यापीठात एका विशिष्ट विचाराच्या लोकांची सत्ता आहे. विद्यापीठाचा कारभार लोकाभिमुख आणि विद्यार्थी पुरक होणे गरजेचे आहे. यासाठी महाविकास आघाडीचे 10 उमेदवार निवडणूक लढविणार आहेत. यामध्ये राष्ट्रवादीचे सहा तर शिवसेना उद्धव बाळासाहेब ठाकरे पक्षाचे चार उमेदवार असणार आहेत ही घोषणा आज पत्रकार परिषदेत करण्यात आली.

बाकेराव बस्ते, सोमनाथ लोहार, आकाश झांबरे, महेंद्र पठारे, अजिंक्य पालकर, विश्वनाथन पाडवी, नारायण चापके, संजय यादव, तबस्सून इनामदार आणि संदीप शिंदे हे उमेदवार निवडणूकीच्या रिंगणात आहेत.

राष्ट्रवादीचे शहराध्यक्ष प्रशांत जगताप यांनी ही माहिती दिली. शिवसेनेचे शहरप्रमुख गजानन थरकुडे, रविकांत वर्पे, सुनील गव्हाणे, राजेश पळसकर, शरद लाड, प्रदीप देशमुख, किशोर कांबळे, मनोज पाचपुते यावेळी उपस्थित होते.

कोरोनाच्या काळात राष्ट्रवादी विद्यार्थी काँग्रेस, युवासेना, एन. एस. यु. आय. या विद्यार्थी संघटनांनी केलेली मदत. ऑफलाइन परीक्षा बाबत महाविकास आघाडी सरकारने घेतलेले निर्णय, कोविड काळात विद्यार्थ्यांवरील गुन्हे मागे घेण्याचा निर्णय, कोवीड काळात ज्या मुलांनी आपल्या पालकांना गमावले त्यांचे शुल्क माफ करण्याचा निर्णय, महाविकास आघाडी सरकारच्या काळात सरकारी नोकर भरतीस आलेला वेग असे अनेक चांगले निर्णय महाविकास आघाडी सरकारच्या काळात घेण्यात आलेले असल्याने पुणे विद्यापीठातील मतदान महाविकास आघाडीच्या मागे खंबीरपणे उभे राहतील, असे जगताप यांनी सांगितले.