वाघोली : निराधाराना आधार देऊन माहेर संस्थेने केलेले कार्य कौतुकास्पद आहे. सामाजिक संस्था कशी असावी व त्याचे कार्य कसे असावे यासाठी माहेर एक मूर्तीमंत उदाहरण आहे.अन्य संस्थांनी त्याचा आदर्श घ्यावा. असे मत गृहमंत्री दिलीप वळसे पाटील यांनी व्यक्त केले.

माहेर संस्थेच्या रौप्य महोत्सवी वर्षा निमित्त मांजरी - आव्हाळवाडी येथील वात्सल्यधाम मध्ये आयोजीत कार्यक्रमात ते बोलत होते. या प्रसंगी पुणे सावित्रीबाई फुले विद्यापीठाचे कुलगुरू डॉ. नितीन करमळकर, युक्रांदचे डॉ. कुमार सप्तर्षी, उद्योजक अश्विन मल्होत्रा, मांजरीचे सरपंच स्वप्नील उंदरे, आव्हाळवाडीच्या सरपंच ललीता आव्हाळे, रोहिदास उंदरे, जेष्ठ समाजसेविका व माहेरच्या संस्थापिका लुसी कुरियन, माहेरचे सर्व संचालक,कर्मचारी उपस्तीत होते.

वळसे पाटील पुढे म्हणाले,

लुसी कुरियन यांनी समाज कार्यासाठी स्वतःला वाहून घेतले. यामुळेच माहेर सारखी संस्था उभी राहिली. माहेरचे कार्य केवळ राज्यभर नव्हे तर अन्य राज्यातही सुरू झाले आहे. ही बाब खूपच कौतुकास्पद आहे. यावेळी त्यांनी पाच लाख रुपये संस्थेला देणार असल्याची घोषणा केली. या प्रसंगी संस्थेत काम करणाऱ्या कर्मचाऱ्यांचा उपस्थित पाहुण्यांच्या हस्ते सत्कार करण्यात आला. माहेरवर आधारित स्माईलस्टोन या पुस्तकाचे प्रकाशन यावेळी करण्यात आले. माहेरच्या मुलांनी ढोल ताशा वाजवून उपस्तीत पाहुण्यांचे स्वागत केले. प्रास्ताविक हरिश औचर यांनी केले. सूत्रसंचालन रमेश दुतोंडे व सलीता यांनी केले. तर आभार अनिरुद्ध यांनी मानले.