वडगाव शेरी - येरवडा (Yerwada) आणि नगर रस्ता (Nagar Road) क्षेत्रीय कार्यालय अंतर्गत आज रस्त्यावर अतिक्रमण (Encroachment) केलेल्या विक्रेत्यांवर मोठी कारवाई (Crime) करण्यात आली. येरवड्यातील पर्णकुटी येथून सुरू झालेली ही कारवाई खराडी येथील पुणे महानगरपालिकेच्या हद्दीपर्यंत करण्यात आली. कारवाई मध्ये तब्बल चौदा ट्रक माल जप्त करण्यात आला.

पालिकेचे अतिक्रमण विभाग प्रमुख माधव जगताप यांच्या मार्गदर्शनाखाली, नगर रस्ता क्षेत्रीय कार्यालयाचे सहाय्यक आयुक्त सुहास जगताप, पालिकेच्या आतिक्रमण विभागाचे विभागीय अधिकारी सुहास ढोकले, विभागीय अतिक्रमण निरीक्षक, अतिक्रमण निरीक्षक, कनिष्ठ अभियंता यांच्या नियंत्रणाखाली पोलीस, सात ट्रक आणि चाळीस बिगाऱ्यांच्या मदतीने ही कारवाई करण्यात आली.

येरवडा येथील पर्णकुटी पोलिस चौकी ते गुंजन टॉकीज पासून ते नगर रोड मनपा हद्द आणि चंदननगर ते मुंढवा मनपा हद्द, विमाननगर परिसर व विमानतळ रस्ता या भागात ती कारवाई दिवसभर सुरू होती.

पदपथावर अतिक्रमण केलेल्या भाजी गाड्या, कपडे व चपलाची दुकाने, फळांची दुकाने, चहाचे हातगाड्या नीराच्या टपऱ्या, वडापावची दुकाने, दुकानांसमोर पार्किंगच्या जागेत अतिक्रमण करून व्यवसायिकांनी ठेवलेले साहित्य या कारवाईत जप्त करण्यात आले.

याविषयी माहिती देताना विभागीय अधिकारी सुहास ढोकले म्हणाले, आजच्या कारवाईत अनेक पदपथ अतिक्रमणमुक्त करण्यात आले. यापुढेही अतिक्रमण कारवाई नियमित सुरू राहणार आहे.