मंचर, ता. १ : महावितरणच्या अकार्यक्षम कारभारामुळे मंचर (ता. आंबेगाव) शहरातील १६ हजार वीज ग्राहकांना मंगळवारी (ता. १) रात्री दोन तास अंधारात राहावे लागले. सायंकाळी सातपर्यंत वीजपुरवठा खंडित असल्याने घरगुती ग्राहकांसह रुग्णालय आणि व्यावसायिकांचे मोठे हाल झाले. वारंवार वीजपुरवठा खंडित होत असल्याने ग्राहकांमध्ये तीव्र संताप व्यक्त होत आहे.

मागील आठ-दहा दिवसांपासून मंचर शहर व परिसरात दिवसा तसेच रात्री वारंवार वीजपुरवठा खंडित होत आहे. दुरुस्तीची कामे वेळेत होत नसल्यानेच ही परिस्थिती निर्माण होत असल्याचा आरोप नागरिकांनी केला आहे. ‘‘मंगळवारी अनेक ठिकाणी विवाह सोहळ्यानंतर सत्यनारायण पूजा व भोजनाचे कार्यक्रम आयोजित केले होते. वीजपुरवठा खंडित झाल्याने संबंधित कुटुंबांना जनरेटरची व्यवस्था करण्यासाठी धावपळ करावी लागली,’’ असे पापा हुले यांनी सांगितले.
मंचर उपजिल्हा रुग्णालयासह शहरातील विविध खासगी रुग्णालयांच्या कामकाजावरही वीजखंडित होण्याचा परिणाम झाला. वीजपुरवठा खंडित झाल्याने रुग्णसेवा सुरळीत ठेवताना डॉक्टर व परिचारिकांना अडचणींचा सामना करावा लागला. दरम्यान, वीजपुरवठा खंडित झाल्यानंतर ग्राहकांनी शेवाळवाडी-मंचर वीज उपकेंद्रातील ऑपरेटरशी संपर्क साधण्याचा प्रयत्न केला. मात्र, संबंधित ऑपरेटर फोन उचलत नसल्याच्या तक्रारी ग्राहकांनी केल्या.
‘‘मंचर शहराला नियमित वीजपुरवठा मिळावा आणि वारंवार होणारे वीजखंडित होण्याचे प्रकार तातडीने थांबवावेत, या मागणीसाठी मंचरकरांचे शिष्टमंडळ राज्याचे माजी सहकारमंत्री दिलीप वळसे पाटील यांची लवकरच भेट घेणार आहे,’’ अशी माहिती मंचर नगरपंचायतीचे उपनगराध्यक्ष लक्ष्मण थोरात यांनी दिली.

मंचरचा वीजपुरवठा सुरळीत करण्यासाठी पावसाची भुरभुर सुरू असतानाही दहा जनमित्र आणि तीन अधिकारी दुरुस्तीचे काम करीत आहेत. नेमका फॉल्ट कोठे आहे, हे अद्याप निष्पन्न झालेले नाही. वीजपुरवठा सुरू करण्यासाठी युद्धपातळीवर प्रयत्न सुरू आहेत.
- जी. एम. शेख, सहाय्यक अभियंता, महावितरण कंपनी, मंचर.