मंचर, ता. २३ : मंचर शहरातील ऐतिहासिक बारवेवरील अतिक्रमण तातडीने हटवावे, अन्यथा २१ दिवसांनंतर स्वतः जेसीबी घेऊन अतिक्रमण हटविण्याचे आंदोलन छेडू, असा इशारा हिंदुत्ववादी नेते प्रमोद बाणखेले यांनी तहसील प्रशासनाला दिला.
यासंदर्भात घोडेगाव येथील तहसील कार्यालयात तहसीलदार राहुल सारंग यांची भेट घेऊन बारवेच्या संरक्षणाबाबत सविस्तर चर्चा करण्यात आली. बैठकीस गटविकास अधिकारी प्रमिला वाळूंज, नायब तहसीलदार सचिन मुंढे, मंचर पोलिस ठाण्याचे निरीक्षक महादेव वाघमोडे तसेच विविध हिंदुत्ववादी संघटनांचे पदाधिकारी उपस्थित होते.
यावेळी बाणखेले यांनी प्रशासनाच्या भूमिकेवर तीव्र नाराजी व्यक्त करत, बारवेवरील अतिक्रमणाबाबत अद्याप कारवाई का झाली नाही? असा थेट सवाल केला. बारव परिसराची अधिकृत मोजणी करून हद्द निश्चित करावी आणि अतिक्रमण आढळल्यास नियमानुसार तत्काळ कारवाई करावी, अशी मागणी त्यांनी केली. हा कोणत्याही व्यक्तीविरोधातील संघर्ष नसून मंचरच्या ऐतिहासिक वारशाच्या संरक्षणाचा प्रश्न असल्याचे सांगत, २१ दिवसांत ठोस कार्यवाही न झाल्यास नागरिकांच्या सहभागातून तीव्र आंदोलन उभारण्याचा इशाराही यावेळी देण्यात आला.