मंचर, ता. २० : मंचर (ता. आंबेगाव) कृषी उत्पन्न बाजार समितीत गुरुवारी (ता. २०) कांद्याची सुमारे ४० हजार पिशव्यांची विक्रमी आवक झाली. अवघ्या दोन दिवसांत चांगल्या प्रतीच्या कांद्याचा बाजारभाव १० किलोमागे ४५०-५४० रुपयांवरून ३५०-४०० रुपयांपर्यंत खाली आले.
मोठ्या प्रमाणातील आवकेमुळे बाजार समिती परिसर अक्षरशः कांद्याने फुलून गेला. कांद्याच्या पिशव्या ठेवण्यासाठी जागा अपुरी पडल्याने वाहनतळाच्या जागेतही कांदा साठवावा लागला. वाहनांच्या पार्किंगसाठीही जागा उपलब्ध नसल्याने बाजारातील व्यवस्थेवर ताण निर्माण झाला.
दरम्यान, गुरुवारी आवक झपाट्याने वाढताच बाजारातील मागणीच्या तुलनेत पुरवठा अधिक झाल्याने दर घसरले.