मंचर - ‘‘पुणे-नाशिक लोहमार्गाच्या कामासाठी पाठपुरावा केला होता. रेल्वेचे काम पुढील वर्षी सुरू होणार आहे,’’ असे खासदार शिवाजीराव आढळराव पाटील यांनी सांगितले.

शिवसेनाप्रमुख बाळासाहेब ठाकरे यांच्या स्मृती दिनानिमित्त मंचर (ता. आंबेगाव) येथे आयोजित कार्यक्रमात आढळराव पाटील बोलत होते. या वेळी शिवव्याख्याते प्रा. नितीन बानगुडे पाटील, शिवसेनेचे जिल्हाप्रमुख राम गावडे, सहसंपर्कप्रमुख ॲड. अविनाश रहाणे, राज्य जागर संघटनेचे अध्यक्ष सुरेश भोर, रवींद्र करंजखिले, सुनील बाणखेले, सरपंच दत्ता गांजाळे, लक्ष्मण काचोळे उपस्थित होते. सुरवातीला छत्रपती शिवाजी महाराज व बाळासाहेब ठाकरे यांच्या प्रतिमेचे पूजन करण्यात आले.

या वेळी आढळराव पाटील यांनी पराग साखर कारखान्यासंदर्भात दिलीप वळसे पाटील व देवदत्त निकम यांच्यावर टीका केली. ते म्हणाले, ‘‘भीमाशंकर कारखान्याला अडचणीत आणण्यासाठी खासगी पराग कारखाना उभा केला आहे. खासगी कारखाना ही शेतकऱ्यांची घोर फसवणूक आहे. मी आता गप्प बसणार नाही. अनेक गोष्टी बाहेर येतील. त्यासाठी मी वेगळी यंत्रणा तयार केली आहे.’’